Proyecto nobo “Nos Amistad” ta cla pa cuminza bishita nos grandinan

ORANJESTAD (AAN): Den cuadra di e siguiente proyecto di Hunto Grandi Grandi Hunto di Fundacion Movemento ta Bida,

recientemente a termina un di fasenan den preparacionan di e Proyecto cual lo hiba e nomber "NOS AMISTAD", cu tabata un curso bao guia di Sra Madelyn Ridderstap, "begeleidingskundige" y Sra Enrita Werleman, "Phycosocial Consultant".

   Durante 4 siman consecutivo nan a percura pa comparti  tur conosemento y duna tur herment necesario na e cursistanan y asina  tur por subi field cu tur confianza y cumpli cu e tareanan apunta na cada un.

   Cada cursista tin e tarea di bishita un adulto mayor 1 biaha pa siman, durante 12 siman consecutivo, cu ta biba den soledad y/of ta sinti falta di compania. Aki lo comparti un tempo valioso cu e adulto mayor, sea cu un combersacion, lesa un buki cu ne, resa, hunga weganan di mesa, dal un koffie hunto, of haci algo cu e lo sinti bon cu ne.  Stella Geerman, Lupita Gil y Ingrid Croes-Dubero, mentornan di e proyecto, lo duna guia na e boluntarionan cu lo bishita e grandinan durante e periodo di 12 siman.

   Como parti di e curso, Sra dr Maritsa Ordoñes di DVG a duna un charla extenso, cu tabata carga e nomber “Envehecimento”. Aki cursistanan a haya informacion di e fasenan, con un persona ta enbehece.

   Pa finalisa e curso Sr Rudy Leysner di FMTB a hiba palabra y a gradici tur e boluntarionan cu lo partisipa na e proyecto nobo aki, cu ta sigur un necesidad grandi. Tambe a gradici D.T.I. pa nan espacio y tur esnan cu di un of otro forma a duna nan cooperacion y CEDE Aruba pa nan aporte.

   Despues cu Rosa Leon, specialista den Gerontologia y alaves coordinador di e proyecto Hunto Grandi Grandi Hunto tambe a hiba palabra, a sigui cu otorgamento di certificadonan na e cursistanan participante, kendenan por cierto tur ta 60+.

   Comienso di e proyecto ta tentativamente e siman di 5 pa 9 di juli y lo termina  e siman di 20 di september.

   DIARIO ta premira cu e proyecto aki tambe lo bira uno, cu lo worde bon acepta mescos cu tur e demas proyectonan cu a worde presenta door di FMTB, cu a cay den masha bon tera, manera por ehempel “Desaroyo Digital”, den cooperacion cu Setar NV, tambe nan “Un canto di alegria den bario”, durante temporada di Pasco, Dia di Mama y Dia di Tata ultimamente, y e Fiesta di San Juan, hunto cu Grupo Nucleo.  Tambe “Nos Hofi 60+”, hunto cu Cas Shabururi, cu “Percussion 60+” na San Nicolas, tambe “Tera y Lama pa 60+” na Eagle Beach, y “Copy Center pa gruponan di 60+”.

   Na final Sr Rudy Leysner a dirigi bunita palabranan di aprecio y gratitud na Sra Lena Orman di Grupo Nucleo, cu hunto cu su esposo Jose Orman, tabata e motor tras di e proyecto Alegria den Bario, specialmente esun di Tata y Mama y di San Juan, unda a bay canta pa e grandinan cu ta nan so of den casnan di cuido.

   Tin algun proyecto cu pronto lo bay mira lus di dia y dentro di poco esakinan lo worde debidamente anuncia den DIARIO.