Proyecto Jump 18 lo siña 18 mucha biba un bida mas saludabel

ORANJESTAD (AAN): Recientemente tabatin e prome introduccion di e di dos grupo di Jump 18 na YMCA Dakota.

Jump 18 ta un proyecto cu aña pasa a ranca sali cu meta primordial ta pa siña muchanan y nan famia pa hiba hunto un bida mas saludabel y haci esaki hunto cu otro famianan tambe. E di dos edicion aki tin un total di 18 mucha cu a join paasina aki 6 luna por mira bek y sinti cu awo nan ta cla pa biba mas saludabel.

   Segun Casemanager Noëmi Haddocks, durante e ‘kick-off’ di Jump 18 ta pa splica kico e proyecto ta encera. Cera conoci cu e muchanan cu ta participando y tambe ki ta e meta pa hunto logra hiba un bida mas saludabel. Alabes a splica con e programa ta hinca den otro. Dianan di haci ehercicio, dia di consulta cu diferente profesional y mas. Segun Haddocks, e dia aki ta pa start e Proyecto hunto y duna animo pa asina termina esaki exitosamente aki 6 luna. 

TEAM JUMP 18

Jump 18 ta consisti di un team bastante grandi cu algun persona encarga esta Dr. Jamiu Busari, Amy van der Linden, Samantha Schwengle, Alexandra Mendoza, Paola Tello, Monique Bagheri. Nan ta wordo sosteni pa Nichole Kock, Godelinde Lauffer, Noemi Haddocks, Sandira Bislip, Lyanne Maduro, Fleur de Groot, Robert Dijkhoff, Myron Ras, Juliandrah Rodriquez, Anna Cellia Proveyer, Indra Ras-Flanegin, Joanne Werleman, Yxselle Giel.

TRAYECTO

E Proyecto ta un trayecto di seis luna. Riba diasabra mayor y nan yiu ta bin pa topa cu e dietista, e casemanager y dokter. Nan tur lo haya e sesion n’e momento ey. Durante siman tambe nan tin cu bay haci tres biaha, riba dialuna, diaranson y diabierna diferente ehercicio cu ta hopi leuk, pero tambe educacional pa nan por siña y despues, sigui riba nan mes pa por biba tiki mas saludabel pero na mes momento ‘having fun’.

DANKI

Ta un danki na e team cu ta carga e proyecto aki completo. Alabes ta yama un danki na tur e sponsors cu a kere den e proyecto.