Mapa di calor pa un futuro resiliente:
*Falta di data accesibel ta limita comprension general di e efecto di clima cambiante
ORANJESTAD (AAN): Den un paso innovativo pa compronde y visualisa e impacto di calor extremo riba comunidadnan insular, Oriana Wouters y su team a lansa un proyecto sin precedente: creacion di mapanan di calor riba cuater isla di Caribe — Aruba, Corsou, Sint Maarten y Jamaica. E mapanan ta basa riba data local y ta representa un herment crucial pa analisa e realidad di cambio climatico y su efecto den bida diario di hende.
E proyecto, cu ta bay pa su fase siguiente, ta enfoca riba e bosnan di esnan mas vulnerabel den comunidad. Door di entrevista cu gruponan manera pasaheronan di bus, deportistanan, obreronan y profesionalnan den sector di cuido, e team ta haya un comprension mas profundo di e manera cu calor ta cambia salud, bienestar y rutina diario di hende.
Segun Wouters, Aruba — manera hopi otro isla chikito — ta sintiendo e presion di cambio climatico. Despues di a traha casi cinco aña den maneho di recursonan natural pa Gobierno di Aruba, Wouters a funda e organisacion IDNOVA (Imagination for Development and the Nature of Values). Actualmente, e ta co-leader di e proyecto regional cu ta traha riba mapa di calor entre 2013 y 2024, visualisando e tendencia y impacto den un forma accesibel pa tur hende.
Durante un entrevista cu DIARIO, Wouters a indica cu falta di data accesibel ta limita comprension general di e efecto di clima cambiante. "Nos ta tende storianan di piscador cu e luna no ta mescos cu antes, of cu piscanan ta core diferente. Cunukeronan ta confronta secura pero tambe un aumento di peste," el a menciona. “Tin cambionan den medio ambiente cu no ta documenta y solamente ora cu ta papia cu hende, bo ta tende kico ta pasando.”
E mapanan ta resalta vulnerabilidad specifico: hendenan cu malesanan cronico, mayor di edad y mucha chikito — specialmente esnan bou di 5 aña — ta mas exponi na efecto di calor extremo. Pa fortalece e proyecto, e team ta colabora cu gobierno y organisacionnan den comunidad, pa integra e mapa den decisionnan relaciona cu salud, educacion, infrastructura y planificacion espacial.
Wouters a enfatisa e importancia pa e informacion y visualisacion ta accesibel pa comunidad. “Nos kier mira con e impacto a cambia durante e ultimo 11 aña, y tambe pa haci e comunidad mas resiliente y autonomo den e decisicionnan cu mester tuma,” el a bisa.
Pa fortalece e balor di e proyecto, e team ta traha na nivel di isla pa papia cu diferente grupo vulnerabel. Na Aruba, por ehempel, e enfoca riba deportistanan y usuarionan di transporte publico. Hendenan mayor di edad no ta inclui den e ronda di entrevista aki, pasobra 'National Climate Resilience Council' di Gobierno di Aruba ya a cubri esey. “E idea ta pa completa loke ta existi y no ripiti, pero pa añadi balor real,” Wouters a conclui.
Mas informacion interesante cu Oriana Wouters a comparti den entrevista exclusivo cu DIARIO lo wordo treci dilanti den un otro articulo.
