Proyecto Grandi Hunto Hunto Grandi ta finaliza pero e Fundacion ta continua

Rosa Leon di Fundacion Movimento ta Bida:

ORANJESTAD (AAN) – Rosa de Leon, Coordinadora di Fundacion Movimento ta Bida, di cual e Proyecto Grandi Hunto Hunto Grandi ta parti di dje, den entrevista cu DIARIO a menciona cu e proyecto aki ta finaliza, pero e Fundacion ta continua.

El a splica cu manera ta conoci, tur proyecto cu ta wordo financia door di samenwerkingsfonds ta wordo financia pa tres aña.

El comenta cu for di pandemia di Covid, nan a siña gara e proyecto aki bon, dunando e adulto mayor e tempo ey, e guia y sosten necesario. Durante cuater aña e proyecto a tende e voz di e adulto mayor kico ta nan inconveniencia, con nan kier crece, trece innovacion den adulto mayor pa cu Aruba.

“Nos por bisa cu, conhuntamente, cu hopi organizacion na Aruba, nos a cera partnership, unda cu nos a brinda e miho cu nos por na nos adulto mayor” Rosa Leon a bisa.

E ta kere cu e miho cu nan a haci ta inspira otro organizacionnan, crea e curiosidad cerca nan. “Den e transcurso di cuater aña nos a traha cu organizacionnan cu nunca a duna un oido na e adulto mayor. Esey pa nos ta un orguyo, mi por bisa, cu nan ta adopta diferente programa cu nos a crea. Mi ta kere cu si nos ta uni cu otro y hacie miho cu nos por hacie, nos ta logra positivismo pa cu adulto mayor”, Rosa Leon a menciona.

El a expresa cu realidad di bida ta cu ni den cuater aña nan por a yega na tur adulto mayor, y ta ilogico pa haci esey, pero si nan a trece curiosidad y den e cuater añanan nan a siña y a keda siña tambe con pa mehora.

“Y nos tur sa cu e adulto mayor su popularidad ta esun di mas grandi na Aruba. Nos mester siña tende nan, kico ta nan necesidad pa nos por brinda nan. Nos tur sa cu nan no kier keda cas, pero si nos keda asina cu man cruza, nos no ta bay yega ningun caminda. En cambio nos por duna nan na un manera realistico loke nos por ofrece di berdad”, el a indica.

Fundacion Movimento ta Bida mes, ta bay sigui cu cierto programanan cu e proyecto a organiza, y esey no kiermen cu e fundacion a caba, sino cu e ta sigui cu su actividad diario, manera canamento den naturaleza y tur locual cu nan ta haci. Nan a adopta cierto programanan y diferente Centro di Bario tambe. “Nos a trece atencion na centronan di bario y a bisa nan di e importancia di tayer di trabao “Con bo ta bira un adulto mayor activo”, saludable, pero contento tambe, door cu nan ta yega un edad cu nan kier hala rosea no di ta liber sin haci nada, pero na un manera saludable”, Rosa Leon a relata.