Negociacionnan cu Quanten ta continua den situacion mundial nobo --- *Proyecto gas pa WEB lo baha costo di bida den crisis mundial --- *2022 por habri cu Aruba distribuidor di gas pa region di Caribe
ORANJESTAD (AAN) — 2021 ta yega na su final. Desaroyonan mundial sumamente dificil ta presenta continuamente como un cadena.
Den e desaroyonan cu DIARIO a sigui di acerca pa asina a prepara Aruba pa un cadena di suceso cu a bira realidad, DIARIO a sigui vigila proyectonan cu ta sumamente importante pa e futuro di Aruba.
Na nivel local y internacional DIARIO a sigui e posibilidad pa dos proyecto sumamente importante pa Aruba por bira realidad.
Periodismo responsabel ta exigi pa lectornan no carga un speransa cu por wordo defrauda. Na mes momento mester percura pa den e descripcion di loke por spera den futuro directo, duna informacion cu tambe ta crea animo pa un Pueblo sigui cana.
Ta esaki a haci cu DIARIO a keda pendiente di tur desaroyo den dos proyecto sumamente importante pa Aruba y cu a wordo presenta na Aruba na final di 2020 dor di Prome Ministro Evelyn Wever-Croes.
Informacionnan local y internacional awor a yega na un punto, cu por wordo considera responsabel pa DIARIO informa, cu e proyecto di Eagle LNG pa Aruba por yega costa di Aruba.
Informacion di cual DIARIO ta dispone ta mustra cu por spera e realisacion di e proyecto aki riba termino hopi cortico.
Esaki ta nifica cu, segun tur informacion, Aruba ta un paso di un acuerdo final cu Eagle LNG pa habri caminda pa e proyecto di gas cu lo haci cu WEB por produci a base di gas loke lo baha sigur e prijs di awa na Aruba y asina baha costo di bida y reduci e efecto di inflacion.
Manera DIARIO a indica na hopi ocasion si logra e proyecto di Eagle, Aruba lo tin un yudansa pa confronta e inflacion, aumento di costo mundial, mientras cu tambe ta habri porta pa e costo di inversion haci Aruba mas atractivo na otro companianan.
Pa loke ta trata e proyecto petrolero Quanten, DIARIO tin informacion cu ainda negociacionnan ta continua den e situacion mundial nobo.
DIARIO di su banda a keda den contacto cu informantenan internacional cu a mustra cu na e momentonan aki, companianan petrolero ta haci nan maximo esfuerzo pa por ahusta na normanan pa medio ambiente den cuadro di cambio di clima.
Esaki tambe tabata uno di e discusionnan ayera den seno di mundo petrolero internacional.
OPEC a reuni y a dicidi cu e ta subi su produccion pero cu e posibilidad cu e por baha su produccion atrobe na Januari.
Na mes momento inrformantenan cerca di operacionnan internacional di petroleo a indica na DIARIO, cu companianan petrolero ta sigui cu nan plannan pa adapta e industria petroleo na menos peliger pa medio ambiente pa asina por enfrenta futuro.
DIARIO ta abstene su mes di yega na cualkier conclusion directo riba loke esaki por nifica pa e negociacionnan entre Aruba y Quanten, cu ta reconoci mundialmente pa su esfuersonan pa enfrenta cambio di clima y hasta tin sosten manera semper DIARIO a bisa di uno di e luchadornan mas ferviente di medio ambiente cu tabata consehero di Gobierno di Merca.
DIARIO ta keda pendiente di Quanten na un 2021 sumamente turbulento pa e sector industrial pero si ta considera cu awor ta responsabel pa splica Aruba cu e proyecto di gas di Eagle LNG ta dilanti costa di Aruba y cu Dios mediante, ta parce di ta un realidad acorda prome cu 2021 yega na su fin!
