Hues a rechaza ponencianan di Fiscal --- *Si e no paga e lo mester bay 1 aña sera den prison
ORANJESTAD (AAN): Diahuebs mainta Hues di Corte den Promer Instancia a dicta sentencia den e caso di labamento di placa cu Ministerio Publico a cuminsa contra Paul Croes. Manera DIARIO a publica, tratamento di e caso a tuma lugar na October 2021, caminda Fiscal a exigi pa Paul Croes paga algo mas di 207 mil florin y si e no paga e lo mester bay 3 aña sera.
HUES A RECHAZA MINISTERIO PUBLICO
Ayera mainta Hues a bisa cu e ta rechaza e peticion di Fiscal pa pospone e caso penal contra Melony Croes-Paesch pendiente e caso di casacion. Hues a mustra cu Hof di Corte Superior a declara Melony liber di e acusacion di labamento di placa di alrededor di 209 mil florin. Hues ta mantene e decision di Hof y a declara Fiscal no admisibel den e caso contra Melony.
Pa loke ta e exigencia di Fiscal pa Paul Croes paga algo mas di 207 mil florin, Hues a bisa cu tin diferencia di opinion entre Fiscal y abogado mr. Illes. Fiscal a calcula riba e 183 mil florin cu Hof a determina, placanan di construccion cu na opinion di Fiscal no tin claridad. Abogado mr. Illes ta haya cu mester mantene e 183 mil florin.
Hues a bisa cu e no ta sigui Fiscal den esaki y ta mantene e suma stipula pa Hof cu ta 183 mil florin cu Paul Croes a laba y mester paga bek.
HUES RECHAZA ABOGADO
Hues tambe a rechaza e peticion di abogado mr. Illes pa tene na cuenta e placanan cu Paul Croes a haya di regalo ora di casamento. Hues a bisa cu Hof a rechaza esey cu lo ta parti di e placanan cu ta acusa Paul Croes di a laba . Hues a bisa cu e ta mantene e decision di Hof o sea cu e tambe ta rechaza e parti aki di defensa. Tambe Hues a rechaza e ponencia di mr. Illes cu Hof lo a haci un fayo den e calculacion tocante placanan Stichting Leadership and Excellence a paga mencionando 10 mil florin siendo cu e mester ta 16 mil florin. Hof a mustra cu e ta sigui e decision di Hof cu e suma ta 6 mil florin
DECISION DI HUES
Hues su decision riba e exigencia di Fiscal ta cu Paul Croes mester paga 183 mil florin y si e no paga esaki, e lo mester bay 1 aña sera den prison.
