Proyecto di restructuracion y embeyecimento di Facilidadnan na Centro Di Bario Lago Heights

ORANJESTAD (AAN):  Diasabra 20 di April, nos tawata tin e privilegio di presencia e esfuerso colectivo pa un mision: sirbi e comunidad.

Centro di Bario Lago Heights tawata e punto di enfoke di e empeño aki. Edmentum, un compania mericano di software educativo a lidera e iniciativa aki. Riba e dia aki, 85 voluntarionan di Edmentum cu ta yama nan mes Edmenturs, a uni forsa cu voluntarionan local y trahadornan di construccion pa completa e construccion di un cancha di basketball, un pista di bicicleta, un ‘speeltuin’, murals  y traha bakinan di mata dilanti e edificio. E proyecto aki tin como meta pa no solamente eleva e Centro di Bario, pero tambe pa brinda oportunidadnan y facilidadnan recreativo y deportivo pa muchanan y hobennan di e bario.

            E inicio di e proyecto a cuminsa pa Linda Nessim, un organizador di evento talentoso, kende a acerca CEDE buscando pa facilita un conexion cu un organisacion local cu lo por of ta desea un espacio educativo y recreativo pa brinda pa muchanan y hobenan den comunidad. CEDE a suministra Linda cu e informacion di diferente organisacionan local, cual finalmente Edmentum a escohe Centro di Bario Lago Heights como e beneficiario di e esfuerso aki.

            Cu un vision, Linda conhunto cu e Programmaleider di Centro di Bario Lago Heights Sra. Shalinie Flores-Rodjan, a traha cu atencion na detaye pa un strategia y un plan meticulosamente pa implementa e proyecto aki, identificando e componentenan esencial pa por a realisa esaki den un tempo cortico.

            Pa por a realisa e vision aki, tawata tin mester di un esfuerso colectivo y nos ta extende nos gratitud na e contribucion generoso di Edmentum, Super Food Plaza Cares Program, De Palm Tours, Aruba Convention Bureau y Cmart Aruba. Ta dor di nan sosten valioso e proyecto aki por a bira un realidad.

            “BARiO UNICO”, un proyecto di CEDE lansa na 2023, ta diseña pa forma conexion y empodera e Centro di Barionan. Nan obhetivo ta ekipa e Centronan aki cu diferente recursonan y hermentnan pa revitalisa nan funcionan den e comunidad.