Proyecto di reforestacion nacional ta conta cu sosten di varios organisacion no-gubernamental

Ban sembra speransa:

ORANJESTAD (AAN): Gabinete AVP-Futuro a lansa un plan ambicioso y sin precedente pa planta 100.000 mata rond di nos isla y a trece 27 organisacion no-gubernamental (NGO’s) cu a uni na e meta.

Notario Hilde Rodriguez-Taekema di Ministerio di Naturalesa y Medio Ambiente, y consehero di Fundacion conserva area Cristal, ta di opinion cu e proyecto di reforestacion ta un esfuerso colectivo entre organisacionnan ambiental, scolnan, sector priva, turismo, comercio y mucho mas.

   Den e prome sesion cu stakeholders, a establece e siguiente paso: formacion di un “stuurgroep” cu lo guia e proceso, y tambe un klankbord pa duna espacio na mas organisacion pa duna input, comparti idea y forma parti di e proyecto.

  ‘Mi no por warda’ ta locual cu Sra. Hilde a expresa riba e proyecto di reforestacion nacional. E cooperacion di tur hende ta di sumo importancia, for di chikito te na grandi. Mirando e gran cantidad di organisacion formando parti di e proyecto, cu un meta comun, por ta optimista cu lo yega e meta.

   Un otro experto cu a participa ta Marck Oduber, liaison pa commission nacional di UNESCO, cu a splica di nan participacion den a plan di reforestacion. Segun Oduber, e plan ta cuadra cu locual nan tambe a bin ta ehecuta pa algun tempo caba y ta un punto importante den e agenda di UNESCO.

   Diferente scol cu ta afilia na e programa di UNESCO tin como meta e parti berde, cual ta e reforestacion di cada scol envolvi. Esaki ta un iniciativa cu a mira su interes y cu hopi scol kier forma parti di dje.

   E imagen di Aruba como ‘concrete jungle’ ta un imagen cu kier aleha di dje. Mirando e efectonan negativo durante yobida torencial y e saturacion inmediato di e suela, ta indicacion di e falta di mata rond di nos isla. Segun Oduber, “desaroyo no por bay a costo di naturalesa, mester por tin un bon balanse”.

Estudionan ta indica, cu tanto lama como e tera, ta refleha riba e salud di un comunidad ora tin balansa di mata, cual ta implementa tambe den e programa di UNESCO.

   Pa e proyecto aki ta exitoso, mester haya sosten di e proyecto di reforestacion nacional, como tambe fondo pa yega e meta stipula. Ademas di tur e planificacion cu stakeholders, ta crucial pa pueblo ta envolvi y biba cu e proyecto.