Proyecto di Agroforesteria na Scol a keda introduci na Scol Basico Washington

Minister Ursell Arends:

ORANJESTAD (AAN):  Diasabra 20 di januari a ranca sali cu e proyecto di agroforesteria na scol basico bou encargo di Ministerio di Naturalesa. Scol Basico Washington tabata e prome scol basico cu a haya nan hardin di alimentacion.

            Cu esfuerso di docente, mayornan, alumnonan y miembronan di comunidad a logra arma e hardin di alimentacion den oranan di mainta y atardi. Durante e dianan prome, miembronan di comunidad y alumnonan a trece diferente mata y simia, entre otro, yambo, sorsaca, shimarucu, pinda y banana.

            “Mi ta orguyoso di e bunita iniciativa aki y mi ta sigur cu nos lo wak e fruta di cosecha den e desaroyo di nos muchanan”, segun e mandatario Ursell Arends kende ta encarga cu sector primario. Cu e hardin aki, alumnonan tin e oportunidad pa siña di agricultura no solamente den teoria si no den practica tambe. Pues e meta di e proyecto aki ta pa inculca habitonan cu lo yuda nos fortalece e sector y crea un pilar economico adicional den futuro.

            Minister Ursell Arends ta duna un danki di curason na un y tur cu a bin yuda. Un danki tambe na Santa Rosa y Living Soil Aruba pa nan aporte inmenso na nos muchanan di scolnan basico. 

            Tur miembro di comunidad ta bon bini pa yuda cu e siguiente dia di plantamento diasabra 17 di februari 2024, 7AM te cu 1PM na Scol Primario Kudawecha. Bin forma parti di e bunita proyecto aki!