Proyecto DCALFA ta bayendo bon y den cada conferencia cada Isla a haya logro

Directora di Santa Rosa, Nathalie Maduro:

ORANJESTAD (AAN)— Nathalie Maduro, Directora di Departamento di Agricultura, Cria y Pesca (LVV-Santa Rosa), y ademas Presidente di “Dutch Caribbean Agriculture Alliance” (DCALFA), cu ta e Alianza di Agricultura pa Caribe Hulandes, den entrevista cu DIARIO, a duna un resumen di e conferencianan cu a tuma lugar.

            Nathalie Maduro a menciona cu e conferencianan a bay hopi bon, y cada un tabata tin su logro. El a cuminza na Curacao, unda tur e Islanan a bin hunto, despues Aruba tabata anfitrion di e di dos conferencia, y a firma un MOU pa formaliza e existencia y tambe e metanan di e plataforma of e alianza.

Despues, aña pasa, nan tabata na St. Statius, unda cu nan a lanza e nomber y logo oficial. Tabata tin presencia di dignatarionan di diferente isla. E aña aki, na Bonaire, e logro tabata cu nan a lanza nan website, pero algo masha importante cu directora di LVV ta aprecia hopi,  ta cu Gobierno Hulandes a sponsor e participacion di un cunukero, un piscado y un criado, di cada Isla.

            “For di e momento ey bo ta haya un feed back un tiki mas cla di kico ta e necesidadnan, pero tambe kico ta nan deseonan, y kico ta e strategianan cu nan a trece dilanti, como posible solucion pa e problemanan cu tin.

            “E biaha aki tambe nos a presenta nos road map, unda nos kier yega cu nos alianza, kico ta nos mision y vision, pero tambe kico ta e proyectonan cu lo bay crea un valor agrega, pa tur seis Isla”, Nathalie Maduro a relata.

            El a agrega cu nan a haya hopi informacion. Minister Geoffrey Wever a participa, tabata presente señora Cicilia, di Bonaire, un dignatario di St. Statius; e otro islanan no a logra pa manda nan dignatario, pero si tabata tin representantenan.

            “Aworaki, nos ta wardando e rapport final pa nos por entregue na nos ministernan, pa wak kico ta e segundo paso cu nos ta bay tuma, despues cu nos ta presenta nos nota”, Nathalie Maduro, director di Santa Rosa a señala.

            Maduro a comenta cu e intencion tras di e alianza-plataforma ta cu nan ta wak posibilidadnan, no solamente pa seguridad di cuminda pa nos Islanan, pero tambe strategia y proyectonan cu e islanan por sostene otro, cu “esaki ta”.

“Aparte di esey nos a wak, door di bishita otro islanan, hopi posibilidad pa negoshi. Pues, pa haci negoshi entre e islanan. Un di e contratemponan cu nos a wak cu ta keda bin dilanti durante tur e conferencianan ta, y nos a wordo confirma riba esaki ora cu nos a scucha di e cunukeronan, ta cu e leynan riba e islanan no ta similar. Esaki ta causa cu pa cierto proyectonan of intercambionan, nan no ta posible”, Nathalie Maduro a señala.