Minister Geoffrey Wever durante presentacion di AFTA:
ORANJESTAD (AAN): Diasabra ultimo, 15 di maart, mundo henter ta conmemora Dia Internacional di Derecho di Consumido.
Den cuadro di esaki, riba diabierna, Aruba Fair Trade Authority a organisa un charla na Universidad di Aruba caminda a expande riba e esfuersonan andando, ambos pa proteccion di competencia husto, y muy en especial e desaroyonan riba e tereno di proteccion di consumido.
E Landsverordening Bestuursrechtelijke Handhaving Consumentenbescherming, cual awo ta na Parlamento di Aruba pa pronto wordo trata, unabes na vigor, lo fortifica e base legal pa garantisa cu derecho di consumido no ta keda solamente riba papel. "Aruba pronto ta drenta un temporada nobo pa proteccion di consumido", minister Geoffrey Wever ta declara.
Inicialmente, AFTA tabata enfoca principalmente riba regla di competencia husto, evitando cartel di negoshi y acuerdo ilegal di prijs. Awor cu e ley nobo aki, AFTA ta ricibi un rol crucial den proteccion di consumido, cu mas poder pa actua contra abuso y violacion sistematico di derecho di e consumidor.
Un Mercado Mas Protegi pa Tur Consumido
Pa formalisa e desaroyo aki, e Landsverordening Bestuursrechtelijke Handhaving Consumentenbescherming ta trece varios cambio clave. E cambionan aki ta nifica cu:
- AFTA por investiga, monitorea y tuma accion contra propaganda falso, manipulacion di consumidor, of producto y servicio cu no ta cumpli cu su calidad prometi, entre otro. AFTA ta haya mas poder pa actua y sanciona (si mester) esnan cu no ta cumpli cu regulacion di negoshi husto.
- Negoshinan ta wordo obliga pa cumpli cu standard di calidad rasonabel pa producto y servicio, evitando promesa falso of engaño, disinformacion, manipulacion di prijs, y otro mal practica di negoshi.
- Consumidonan ta haya un portal digital, unda nan por haya informacion cla riba nan derecho, y den caso ta sinti cu a viola uno su derecho, nan por entrega un keho di forma mas facil. Si ta resulta cu ta un patronchi sistematico, AFTA tin tur autoridad pa actua.
Confianza den Mercado ta Esencial pa Crecemento di Aruba
Minister Geoffrey Wever ta enfatisa cu e introduccion di e ley aki ta un di e paso mas importante den proteccion di consumido na Aruba, reforsando asina e leynan di derecho di consumido. Un regulacion fuerte no solamente ta proteha consumidonan, pero tambe ta beneficia empresario bon cu ta traha cu integridad, eliminando competencia desigual di esnan cu ta bay contra regulacion.
“Un consumido informa ta un consumido fuerte", segun minister Wever.
Confianza den e mercado, claridad riba derecho y actuacion real ('handhaving') ta esencial pa un pais cu ta crece economicamente y socialmente. Aruba ta drenta un epoca nobo di proteccion di consumido, y nos ta invita tur hende pa sigui e desaroyo di e ley aki, pa asina tur consumido por conoce y uza su derecho cu mas confianza.
Esaki ta un cambio cu ta beneficia nos tur. Pa un Aruba cu mas transparencia, mas proteccion, y un mercado mas fuerte!
