Investigacion complot pa baha Gobierno Wever-Croes cu angulo nobo
- Aumento pensioen cu 700 cu a bira 250 Florin tabata un sopi pura?
- Kico a pasa realmente 9 di September 2024 den sala di Parlamento?
ORANJESTAD (AAN) Aruba ta den un crisis mucho mas serio cu hopi hende ta pensa. Esaki a opinion di informantenan clave, cu ta di opinion cu un situacion sumamente peligroso pa democracia, ta presente den loke mester ta gobernacion di Aruba.
“E formacion actual di Gobierno no solamente ta tuma hopi tempo, pero na mes momento sigur tin refleho den Parlamento di Aruba y ta crea situacionnan cuestionabel pa comunidad.”
Un ehempel sigur di un situacion extraordinario ta keda, e hecho cu ainda mr. Geoffrey Wever ta Ministro di Gabinete Evelyn Wever-Croes, ta dicidi pa proyectonan pa partido RAIZ, mientras e ta co lider di partido Futuro di co formador di Gobierno Gerlien Croes.
“Pa ley como Ministro demisionario, Geoffrey Wever no por tuma decision den e Gabinete Evelyn Wever-Croes, pero e ta participante na decisionnan di partido Futuro y ta ricibi tur informacion necesario di Gerlien Croes,” a bini dilanti.
Informantenan clave ta sigui insisti cu for di September 2024, un situacion cu democracia no ta permiti, ta presenta su mes na Aruba, pa medio di falta di transparencia di loke realmente ta socede den mundo di gobernacion di e pais.
“Bolter cos,” tabata e palabranan di Mike Eman ora el a presenta e lista di AVP pa e eleccionnan cu mester a wordo adelanta, sin cu por papia di un crisis real cu Pueblo por spera den gobernacion.
Mike Eman na e momento, segun tur indicacion, sigur tabata den un situacion preta, pero na ultimo momento a presenta un lista den cual el a mustra cu AVP ta “bolter cos”.
Informacionnan cu DIARIO ta ricibi actualmente, ta indica, cu e careda di Mike pa bolter cos y haya voto a haci cu el a haci e promesa grandi di aumento di pensioen di 700 Florin, cu a percura pa e haya voto.
E ansia den cual a priminti e 700 Florin sin bon estudio, sigur a sali na cla ora durante actual formacion, a resulta cu SVB no por aumenta pensioen di behez cu 700 Florin y cu Aruba solamente por duna un reparatie toeslag di 250 Florin.
Informacionnan cu DIARIO ta ricibi awor den un situacion politico cu un formacion di Gobierno cu por wordo considera hasta caotico, ta duna indicacion cu mester confirma e posicion di DIARIO cu algo sumamente serio a pasa cu Aruba na September 2024, ora Gobierno di Aruba a cay a base di traicion di parti di partido RAIZ, cu a stop di existi pero ya pa un parti tabata miembro di partido Futuro den persona di Geoffrey Wever.
DIARIO na varios ocasion a cuestiona e hecho cu Wever por tabata y te awe ta pa RAIZ Ministro den Gabinete Wever-Croes y na mes momento co-lider di partido Futuro.
Seriedad di e asunto y exigencia pa claridad pa Pueblo di Aruba sigur ta bini dilanti, despues cu DIARIO a wordo informa di un texto di ex Presidente di Parlamento Edgard Vrolijk riba Facebook, caminda e ta mustra cu dia 9 di September, Benny y Douwers tempran a drenta su oficina y a bisa cu nan no tin nada contra su persona pero cu politica ta cruel y cu nan mester sostene Raiz, Accion 21, Mas y Futuro pa pone un fin na Gabinete Evelyn Wever-Croes.
Segun e texto di Edgard Vrolijk riba Facebook recientemente, el a bisa nan e tempo cu tabata beurt di MEP pero cu despues lo ta di nan.
E informacion aki cu lo ta relaciona cu e sucesonan den seno di coalicion di ultimo dia cu sosten y no sosten di Futuro pa AVP, sigur ta tira un luz nobo riba desaroyonan na Aruba, cu por bira victima di un situacion politico cu falta enorme di transparencia.
Segun e informacionnan aki pues, AVP a bay participa na e loke a wordo yama e tempo “coalicion di partidonan chikito” di cual Raiz tabata forma parti na forma di traicion como partner di coalicion di Gabinete Evelyn Wever-Croes.
Informantenan mas y mas ta presenta presenta na DIARIO informacionnan cu ta indica cu desaroyonan serio, cu no ta cuadra cu e transparencia cu democracia ta exigi, a tuma lugar na Aruba, ci final por bira victima di uno di e situacionnan mas serio cu e pais a conoce.
Manera a wordo mustra na DIARIO, ora Mike Eman na ultimo hora a presenta cu un lista den cual el a pone su mes na ultimo lugar pasobra lo tabata tin desunion den seno di AVP entre e gruponan bieu y hoben, el a papia di “bolter” cos.
Segun informantenan awor tur berdad mester subi mesa na momento cu Mike Eman ta bay forma un Gobierno cu e lo mester dirigi como Prome Ministro, pero den cual riba cierto asuntonan, Futuro ta keda cu e derecho di “veto” pues di desaproba, manera a socede cu e presentacion di Desiree Croes como Ministro Plenipoenciario.
DIARIO lo sigui mantene su lectornan informa!
