Mientras Gobierno Hulandes ainda no por yega na formacion
*Legalisacion di prostitucion na Hulanda no ta estorbo pa criminal
*Na Rotterdam tres persona sin cas a muri den un tempo corto
ORANJESTAD (AAN) — Un Gobierno ainda no por wordo forma. E lista di problemanan cu mester haya un solucion, ta sigui crece.
Hulanda a firma acuerdonan importante den cuadro di desaroyonan mundial manera ta e caso cu cambio di clima, cu ta en espera di decisionnan importante cu lo afecta trafico di persona pero tambe e maneho di Gobierno Hulandes enfrente campesinonan.
Dos di e desaroyonan cu mas tin preocupacion di e Pueblo Hulandes, sinembargo, ta e forma cu criminalidad por sigui crece den situacionnan cu den hopi caso, no ta haya e atencion cu nan merece den publicidad local ni internacional.
Diariamente na Aruba tin personanan cu ta dicidi pa establece nan mes na Hulanda, cu a bira tambe uno di e paisnan, cu ta sigui crece a base di migracion cu su raiz den e escalacion mundial di guera.
Esaki a aporta na criminalidad, cu ta sigui crece na Hulanda, cu pa medio di ley a trata na soluciona su casonan pero sin resultado aparente.
Uno di e problemanan enorme cu Hulanda tin actualmente ta nace for di e crecemento di prostitucion, cu a wordo legalisa na 2000.
E hecho cu awor e profesion di prostituta na Hulanda ta un trabou regla pa ley, no a haci cu e profesion a bira menos riesgoso pa su practicantenan.
De facto criminalidad ta sigui manifesta su mes mientras na tur forma personanan cu ta beneficia di e entradanan di prostitucion na Hulanda, ta trata cu exito na atrae gruponan grandi di personanan cu ta biba na paisnan Europeo cu ta den crisis causa entre otro pa guera.
Criminalnan no ta duna ningun balor na e hecho cu for di 2000 Ley ta permiti pa un persona habri un centro di prostitucion of huur bentananan, den cual prostitutanan ta exhibi nan mes como mercancia na clientenan.
Tur persona cu ya a cumpli cu edad di 18 aña por participa na e mundo di prostitucion Hulandes, cu ta keda atrae criminalidad.
Na mes momento Hulanda no por yega na un solucion pa e cantidad di personanan cu no por haya un vivienda y ta dicidi pa haci uzo di sitionan publico como nan lugar pa campa.
Drumi na aire liber ta prohibi na Hulanda y polis ta actua contra personanan cu haci nan mes culpabel di uza lugarnan publico pa nan drumi of pone un tent pa nan campa sin peliger.
Con serio situacion di vivienda ta na hopi pais y tambe na Hulanda sigur ta bini dilanti den e cantidad di tentnan cu na Aruba ta wordo uza den Semana Santa pa campa, pero ta cas na otro lugarnan na mundo.
Informantenan ta indica na DIARIO cu e temporada a yega cu estudiantenan ta cuminsa prepara pa bay Hulanda bou guia di e Gobierno.
Sinembargo, den e temporada di vacacion grandi, hopi hende cu kier busca un bida nobo na Hulanda, ta dicidi di muda pa e pais.
DIARIO a cumpli cu e peticion pa splica publico di Aruba cu mester practica cautela na Hulanda, caminda hopi problema social ta nace pa Arubianonan tambe den situacionnan cu Aruba no conoce.
Manera DIARIO a splica for di prome cu eleccion Hulandes, un cambio grandi pa garantisa un mihor nivel di bida na Hulanda ta exigencia di e Pueblo Hulandes enfrente politiconan, cu sigur tin un trabou grandi ta spera nan si tene cuenta cu e dos aspectonan trata den e articulo di awe pa asina informa tambe tur cu kier bay biba na Hulanda y di antemano ta uza medionan social pa busca contacto, sin preocupa cu kende nan ta drenta realmente den contacto.
