Luis Chong di GKMB:
ORANJESTAD (AAN): Luis Chong, Director di Gele Koorts Muskieten Bestrijding (GKMB) a confirma cu Aruba ta observando e situacion cu tin actualmente den e region pa loke ta dengue.
Fin di aña pasa caba noticianan a cuminsa drenta relaciona cu outbreaknan di dengue na entre otro Brasil, Argentina, Panama. Mas recientemente a tende cu tabatin 'outbreak' na Boneiro y na Corsou como tambe na Isla Ariba.
Door di esey, Chong a indica, y tambe pa medio di Pan American Health Organization (PAHO) y World Health Organization (WHO), cu tambe ta mandando alertanan pa tur pais cu ta afecta pa e sangura di dengue, pa nan ta riba un alerta mas halto cu normal pasobra e transmision di dengue ta mas hopi cu añanan anterior.
Na Aruba ainda esey no ta e caso, pero esey no kiermen cu nos mester drumi, a expresa. Mester ta na alerta pa wak e casonan importa di dengue y pa ta alerta pa tene e areanan limpi di criaderonan di sangura. Esey ta e parti di prevencion cu mester haci y sigur ta un parti hopi importante aworaki pa evita e transmision di dengue door di elimina criaderonan, Luis Chong di GKMB a remarca.
