Prome restaurant Olive Garden ta habri na Aruba

MetaCorp ta sigui inverti den nos economia

ORANJESTAD (AAN): Awe Diamars 21 di Juni, e prome Olive Garden Restaurant ta habri.  Olive Garden ta masha famoso pa su generosidad Italiano, incluyendo su “garden-fresh salad”, sopi estilo di cas y su pan di garlic fresco horna eyden mes. Olive Garden ta e cadena di restaurant Italiano mas grandi den henter Merca, operando mas di 880 restaurant y ta emplea riba 96 mil trahado.

   MetaCorp a haci un inversion cuantioso den e prome restaurant di Olive Garden na Aruba, situa den e compleho Gloria Movies, Dining, Entertainment and Play.

   E prome Olive Garden ta midi 380 meter cuadra cu 15 mesa riba terasa y a emplea no menos di 80 trahado pa por carga e operacion. Parti paden DIARIO a nota cu tin tres seccion di comedor, y como 182 pico asiento.  A nota cu como 13 trainer di Oliver Garden tabata presente durante un almuerzo special pa prensa riba Dialuna.  Corda cu pa bo drenta Olive Garden, bo tin di pasa parti paden via di e lobby di Gloria.

   DIARIO a ricibi fabuloso servicio di Denis, cu cada rato ta pasa check si bo kier extra Garlic Bread, of mas softdrink.  A nota cu e simpatica Idelien tabata percura pa fabuloso bebida den e Bar.

   “Nos ta contento pa cera un aliansa cu MetaCorp pa por sigui expande Olive Garden den Caribe door di habri e prome Olive Garden na Aruba. Nos sa cu e amplio experencia di MetaCorp den e industria di cuminda y entretenimento lo yuda nos sirbi e clientenan di Aruba na un forma exitoso”, asina Bradley Smith, Senior Vice President of Franchising di e compania Darden Restaurants, cu ta doño di Olive Garden, a enfatisa.

   E menu extenso di Olive Garden ta ofrece e clasico Chicken Alfredo, Lasagna y Chicken Parmigiana, tur prepara fresco y cu ingredientenan di calidad superior. Olive Garden ta famoso pa su cuminda Mericano Italiano, cu su salada, sopi y su breadsticks cu ta mundialmente conoci. Adicionalmente, e estilo familiar di e restaurant ta permitie di ta e luga ideal pa famia, grupo di amigo of colega, pa disfruta di un dushi cuminda den un atmosfera confortabel.

   Eddie de Veer di MetaCorp a pasa saluda prensa tambe.  “Manera nos a menciona na fin di aña pasa, ta nos intencion pa sigui inverti den nos economia. Den e ultimo 100 añanan di nos existencia, semper MetaCorp a inverti na momento cu mas nos economia tabatin mester di dje,” de Veer a bisa.

   El a finaliza bisando: “Pasobra nos vision ta, cu si nos como Rubiano no kere den nos mes, ta ken si lo kere den nos pais. Y manera ta costumber, nos semper ta scoge pa lo miho pa Aruba y Olive Garden sin duda lo complementa e mix di restaurantnan famoso y di bon calidad riba nos isla”.

   Olive Garden lo ta habri tur dia for di 11:00 am caba.