Ministro Geoffrey Wever:
ORANJESTAD (AAN): Siman a habri cu Minister Geoffrey Wever y Departamento di Asuntonan Economico di Aruba a tene un reunion digital cu Economisch Bureau Amsterdam riba e proyecto pa traha un “koopkrachtmodel”.
Un “koopkrachtmodel” ta un instrumento di maneho pa midi e posibel impacto di maneho riba e poder di compra di hogarnan na Aruba. Pais Aruba actualmente no ta dispone di un modelo asina.
E proyecto ta consisti di dos fase. E prome fase ta encera traha e modelo y lo tin un duracion di 9 siman. Fase dos ta trata di ofrece training na di Departamento di Asuntonan Economico, Comercio y Industria den uzo di e “koopkrachtmodel”.
Durante e reunion cu Economisch Bureau Amsterdam a elabora ampliamente riba e cuatro stapnan necesario pa traha un “koopkrachtmodel” pa Aruba. E prome stap ta pa defini un cantidad di hogarnan, “voorbeeldhuishoudens” cu ta un refleho di tur hogarnan na Aruba. Despues Economisch Bureau Amsterdam lo inventarisa e maneho relevante existente di Aruba cu ta afecta e poder di compra. Di tres stap ta determina e ingreso disponibel pa e hogarnan aki. Por ulitmo lo combina e stapnan aki cu e desaroyo di inflacion y salarionan. Economisch Bureau Amsterdam ta premira di tin un prome version di e “koopkrachtmodel” den luna di maart.
Un meta importante di maneho economico ta pa mehora e poder di compra di tur ciudadano. Pa logra e mehoracion di poder di compra ta necesario pa tin un instrumento manera e “koopkrachtmodel”. Un “koopkrachtmodel” ta haci posibel pa na un manera efectivo implementa maneho cu un impacto positivo riba e poder di compra na Aruba. Como instrumento di maneho, e “koopkrachtmodel” lo contribui na mehoracion di e poder di compra.
“Ta importante cu como Pais nos aloca e fondonan necesario pa yega na un “koopkrachtmodel”. Ta un inversion necesario cu lo aporta na tuma decisionnan responsabel y cu un impacto positivo riba e poder di compra na Aruba, segun minister Geoffrey Wever.
