Prome Minister Wever Croes:
ORANJESTAD (AAN): Diadomingo 4 di februari tawata Dia Mundial di conscientisacion di Cancer. Rond mundo, e yamada pa accion di conscientisacion a resona pa inspira tur nacion pa para uni contra cancer y crea un cultura di empatia, curashi y determinacion. Prome Minister Evelyn Wever-Croes ta encurasha Aruba henter pa para hunto den e lucha contra cancer pasobra nos forsa ta den union. Cancer no conoce frontera, e no ta discrimina pero tampoco e potencia di e determinacion di e union di cada ciudadano pa ta conscientisa tocante e malesa aki y e cuido di salud.
Hunto un nacion por trece cambio positivo den bida di esnan afecta pa e malesa desastroso aki. Pa haci esaki, cada ciudadano mester haci pa nan mes un obligacion y un costumber pa yuda pa detecta cancer tempran y na tempo pa nan mes.
Biba un bida saludabel ta e prome recomendacion pa logra esaki. Tambe nos mester brinda sosten na personanan cu ta pasando den tratamento como tambe na nan famia. Importante ta tambe pa nos ta atento pa conscientisa tocante prevencion y deteccion tempran, pasobra conscientisacion ta e prome paso pa triunfo riba e enemigo aki.
“Aruba, laga nos ta e sosten, compasion, y forsa pa esnan cu ta enfrenta e desafionan di cancer. Hunto nos por crea un futuro unda cu e palabra cancer ta bira e sinonimo di curashi, triunfo y sigur tambe di cura”, Prome Minister a expresa.
Prome Minister ta gradici tur fundacion y organisacion na Aruba cu ta trahando incansablemente den cuido y conscientisacion di cancer. “Boso pasion y dedicacion ta ilumina e caminda di speransa, enfocando no solamente pa yuda pashentnan cu cancer pero tambe pa salba bida di hopi persona. Cancer ta un malesa cruel cu no ta discrimina. E por bati na nos porta cualkier momento. Prevencion te ainda ta e unico arma. Cada esfuerso, cada gesto, ta reforsa nos determinacion, y ta recorda nos cu den union, nos ta crea un futuro mas briyante”, Prome Minister a enfatisa.
