Prome Ministro pidiendo pa stimula nos muchanan for di chikito pa nan lesa mas hopi posible

Festival di Buki pa Mucha ta bay cuminza

ORANJESTAD (AAN): Otro siman dia 4 di november ta tuma luga apertura di “Festival di Buki pa Mucha” y e aña aki ta celebrando 30 aña. Prome Minister Evelyn Wever-Croes ta invita henter comunidad pa sigui e actividad cu lo tin a traves di medianan social y pa bishita esaki cu e muchanan pa nan siña di e importancia pa lesa.

   Prome Minister Evelyn Wever-Croes a splica cu ta importante pa inculca den nos muchanan desde chikito caba con importante e ta pa nan lesa y pa como adulto yudanan lesa. “Ora bo lesa, un mundo grandi ta habri pabo, bo ta bishita luganan cu otro forma bo no ta bishita y bo ta conoce hopi cos den bida cu di otro forma bo no ta logra concoce. Ban stimula nos muchanan di chikito, pero na grandi tambe, pa nan lesa mas hopi cu ta posibel.”

   Finalmente, Prome Minister Wever - Croes a gradici cada persona cu ta haci e Festival di Buki pa Mucha posibel un biaha mas, especialmente e ekipo dinamico na Biblioteca Nacional di Aruba, señora Astrid Britten y señora Zetsia Ponson y henter e team.

   “Danki pa haci’e posibel cu nos por gosa fisicamente hunto di e Festival di Buki pa Mucha. Ohala cu tur scol por duna nan aporte pa asina cada scol por celebre na su forma.”