Prome Ministro a tene reunion cu Ministro Surinameño di Exterior

Suriname tin hopi oportunidad y lo yuda den diversifica e economia di Aruba

ORANJESTAD (AAN): E siman aki, Prome Minister Evelyn Wever-Croes a reuni cu Minister di Relacion Exterior di Suriname señor Albert Ramdin hunto cu Directora di Directie Buitenlandse Betrekking (DBB) di Aruba, señora Jocelyne Croes.

   E relacion cu Suriname y Aruba ta estrecho y e aliansa strategico cu e pais aki ta di importancia pa Aruba. Manera ta conoci, Suriname ta un pais cu ta exporta entre otro, fruta, berdura, carni, palo, metalnan precioso, material di construccion y mucho mas. Esaki ta haci cu Suriname ta un pais interesante pa Aruba haci negoshi. Pa e motibo aki, Prome Minister ya pa varios ocasion a reuni cu Minister Ramdin pa asina fortifica e relacion entre Aruba y e pais Sur Americano. 

   Prome Minister ta menciona cu mescos cu Aruba, e economia di Suriname ta creciendo. Un punto hopi importante ta cu recientemente a descubri petroleo na e pais y Aruba cu tin un historia den e industria aki lo por hunga un rol den e area aki. Otro interes cu Aruba tin cu Surinam ta pa e diversificacion di e economia di Aruba. Pa esaki na e momento aki tin un handelsmissie di Aruba na Suriname, bou liderazgo di Minister di Asuntonan Economico, Comunicacion y Desaroyo Sostenibel, Geoffrey Wever. E delegacion lo tin reunionnan cu Presidente di Suriname, señor Chandrikapersad Santokhi y varios minister di e pais pa asina explora e posiblidadnan di comercio cu Suriname.

    Otro punto importante pa e aliansa cu Surinam ta cu e pais aki ta produci y exporta un cantidad grandi di producto di Agricultura manera fruta y berdura y si Aruba por logra haya bon prijs di importacion pa esakinan, esaki lo yuda na baha e costo di bida na Aruba.

   “Un bes mas a trata di un reunion hopi fructifero. E aliansa strategico cu Suriname ta hopi importante pa Aruba. Nos a topa varios biaha caba, e ultimo biaha tabata na e conferencia di SIDS na Antigua. Nos ta determina pa sigui traha hunto, trece e pueblo di Surinam y Aruba mas cerca di otro pero principalmente nos ta interesa pa e aliansa aki trece beneficio pa e pueblo di Aruba”, Prome Minister a indica.