drs. Mervin Wyatt-Ras:
ORANJESTAD (AAN): Segun drs. Mervin Wyatt-Ras di AVP, na clausura di e Interparlamentaire Koninkrijksoverleg (IPKO) cu a tuma luga e siman aki na Curaçao, lamentablemente e parlamentario di AVP, hunto cu esun di otro pais den Caribe Hulandes, mester constata cu e reforma den Landspakket, leu di beneficia comunidad, ta ignora loke mas ta afectando nan: pobreza, empleo y nos clima.
A yega na e conclusion cu gobierno di Aruba no ta informando parlamento manera mester ta, ni sikiera su mesun fraccionnan di coalicion.
Ta p’esey un Shaliny Tromp-Lee di fraccion MEP ta hay’e ta pidi transparencia for di e Secretario di Estado di Hulanda, pasobra e no ta hay’e for di su mesun prome minister y lider di partido.
“Eynan bo ta mira un gobierno dictatorial, un Evelyn Wever-Croes cu ta firma ki papel cu e haya sin informa pueblo mi su propio hendenan. Unda cu e wak un papel e ta firma,” asina Wyatt-Ras a declara.
El a purba di haci mesun cos cu COHO, sinembargo parlamento a demostra energicamente cu no ta acepta esey y mester respeta nos autonomia. Asina mes, el a hinca Aruba den e convenio aki di landspakket.
Aki Wyatt-Ras a bisa: “Ta bay haya reforma cu ta impone riba nos pueblo, cu ta trece medida cu ne y ta empobrece nos pueblo tanto riba tereno social, pero tambe salud publico.”
Pa e parlamentario ta simplemente inhusto cu nos hendenan tin cu paga pa nan medicina y esey ta djis un refleho cu gobierno no ta sinti pa su pueblo. Na fin di dia AVP a haya rason ora cu a bisa cu e landspakket no ta na beneficio di nos hendenan.
“Door di e gobierno descabeya aki, sin pia sin cabes y sin vision, mentiroso, cu no ta informa parlamento, nos tin cu bay back na cas y haci huiswerk pa sali na defensa di e bienestar di nos comunidad Arubano.
