Tripartiet: --- *Finansas y posibilidadnan di inversion tabata riba mesa
ORANJESTAD (AAN): Premier di Aruba, Evelyn Wever-Croes a duna di conoce durante un conferencia di prensa dialuna atardi cu den e tripartiet a atende puntonan di similaridad, pero tambe puntonan di diferencia.
Aruba door di Covid-19 a wordo afecta severamente, a remarca y aworaki tur energia y atencion ta den e direccion di recuperacion. Ta mirando un recuperacion di turismo y pa fin di aña esaki lo ta den un 70 pa 73% y ta mira tambe un crecimento economico e aña aki di 13.6%.
Segun Wever-Croes, tur esaki ta bon pero ainda no ta 100 porciento y ainda no a yega unda mester yega pa por carga tur e gastonan cu e entrada cu gobierno ta haya.
Dialuna a delibera hustamente riba e temanan ey manera e sosten di likides, e palabracionnan cu Hulanda, COHO, ley di RAft y di otro diferente aspecto cu tin en comun, pero mas importante ta pa mira con por traha hunto pa por yuda trece mas progreso y bienestar pa tur tres isla.
Esaki ta e prome reunion tripartiet cu ta tuma lugar despues cu Covid-19 a afecta mundo henter. E reunion aki a tuma lugar riba recomendacion di Prome Minister di ArubA, asina Premier di Corsow, Gilmar Pisas a indica.
A haci algun palabracion manera cu e reunionnan aki lo tuma lugar virtualmente un biaha pa luna, pero tambe riba un base di cada 3 luna den persona pasobra a keda demostra cu for di e reunionnan aki ta saca afo hopi conocimento for di otro.
Manera a menciona tambe a papia riba e tema di finansas y e posibilidadnan di inversion, asina Evelyn Wever-Croes a indica.
E ministenan di finansas a yega na cierto palabracionnan concreto riba con pa bay traha proposicionnan riba e pago bek di e debe.
Pa loke ta inversion, mester bay papia riba esaki cu e ministernan di economia riba un par di bon ideanan cu tin. "Poco poco nos lo trece esaki mas den publicidad", e mandatario a señala.