E ta den combersacion cu Directie Onderwijs:
ORANJESTAD (AAN) – Minister di Enseñanza y Deporte Endy Croes a atende e conferencia di prensa di Gobierno, Dialuna 8 di November aki. E mandatario a cuminza pa referi na e tema di enseñanza, expresando cu e compas y guia pa enseñanza ta keda e metanan di Desaroyo Sostenible “SDG-4” y tambe e Plan Nacional di Educacion “Pen 2030”.
Den e combinacion aki, e mandatario lo scucha e veld y su profesionalnan y di e manera ey lo bin na decisionnan balansa, cu tur ta carga pa e miho porvenir di enseñanza.
“Algo cu a resalta semper den esaki ta e calidad di enseñanza cu nos tur ta boga pe, ‘e lifelong learning’ cu nos tur ta papia di dje, y tambe e parti pa brinda oportunidad na tur hoben pa haya acceso na un enseñanza di calidad, cual nos ta para p’e tambe”, Minister Endy Croes a señala.
El a toca tambe e tema di data. E mandatario ta haya cu ta hopi importante pa mantene data na un nivel cu por tin acceso na dje di inmediato, y atravez di dje tambe por conduci e plataforma di enseñanza den su totalidad, na un miho manera.
“Pa e poco tempo cu mi tin den funcion, mi a combersa cu Directie Onderwijs, den e caso aki, y nan tin un sistema cu yama ‘openEMIS’ atravez di UNESCO, cu si no ta hera nan a haya y nan ta trahando riba dje, pa compila data, pa asina por maneha tambe e Departamento di Enseñanza, na un miho forma”, el mandatario a subraya.
El a agrega cu mesora a mira cu tin un deficiencia ainda, y el a duna algun ehemplo cu a ripara di biaha, y cu por ta dentro di dos of tres luna Aruba por teynan tambe.
El a pone SKOA por ehemplo, cu tin 46 scol cu ta link na un sistema unda e cabesantenan por yena tur data di cada alumno. E bestuur di SKOA ta haya e datonan aki, pero e traspaso di tur e 46 scolnan aki pa e “OpenEMIS” di Departamento di Enseñanza, ainda no tey.
“Pues, den un reunion reciente mi a pidi tambe cooperacion di Directie Onderwijs, den e caso aki, pa na nivel di director combersa riba e protocolnan tocante kico e Departamento aki tin mester na informacion, di entre otro, SKOA. Y di parti di e bureau nos a papia ya caba direct cu un compania, pa traha e interface meymey, pa dentro di poco e data aki por core y yega tambe na un forma diario, semanal, multi-base, cu nos por tin e data, entre otro, papiando di SKOA”, e dignatario a splica.
Minister Endy Croes a pone tambe e ehemplo di DPS. Ora el a verifica esaki, den encuentro cu DPS cu ta scolnan publico cu ta cay directamente bao su maneho, eynan ta core un poco mas atrasa, y falta pa crea e sistema mes ainda, pa cual tambe ta bay tin combersacion e siman aki. El a agrega cu mescos mester link un interfase e 20 scolnan di DPS, cu nan informacionnan por yega rapidamente pa Direccion di Enseñanza, y di e manera aki por concretiza pa nan por tin data available pa por maneha enseñanza den su totalidad, den futuro cercano y asina por ta, tambe, mas eficiente. Asina e dignatario a señala.
