Prome Minister ta desea Parlamento di Aruba un Aña Parlamentario exitoso

Esaki ta e di 37 Aña Parlamentario di Pais Aruba

ORANJESTAD (AAN):  Diamars 13 di September, a tuma luga e apertura di Aña Parlamentario 2022-2023. Esaki ta e di 37 Aña Parlamentario di Pais Aruba y e ta un momento hopi solemne pa e organo di mas importante di Pais Aruba.

            Gobernador di Aruba,  S.E. Alfonso Boekhoudt a duna un discurso elocuente den cual el a repasa e retonan cu Aruba ta pasando aden y su vision y bista pa futuro di kico tur ta spera nos.

            Prome Minister Evelyn Wever - Croes a duna di conoce cu Gobernador a hiba su discurso na un forma hopi cla y detaya expresando kico tur Gobierno ta trahando riba dje.

“Berdad nos a pasa den momentonan hopi dificil cu Covid, pero nos ta den recuperacion. Aruba ta un di e paisnan cu a wordo afecta mas fuerte, pero nos ta recuperando tambe mas fuerte. Esey ta danki na henter e comunidad di Aruba y na Parlamento di Aruba cu den e momentonan di mas critico, a sa di mustra su disponibilidad y flexibilidad pa sostene Aruba henter den momentonan dificil, Prome Minister Wever - Croes a expresa.

            Terminando Premier Wever - Croes a gradici Presidente di Parlamento, señor Egdard Vrolijk cu a wordo re eligi, Vice Presidente di Parlamento sr. Raymond Kamperveen y henter Parlamento di Aruba, un aña Parlamentario hopi exitoso y cu poder di Dios ta logra pasa e leynan cu tin cu pasa pa sigui recupera tur locual cu a perde durante di Pandemia.

            “Den union para hunto enfrentando tur reto hunto, Gobierno, Parlamento di Aruba y pueblo di Aruba, a logra trece progreso y bienestar pa henter nos comunidad.”