ORANJESTAD (AAN) – Minister Presidente Evelyn Wever-Croes tambe a toca e tema di desaroyo economico, durante e conferencia di prensa di dialuna mainta, unda el a enfoca riba desaroyo di turismo.
“Turismo, te na e momentonan aki, nos tin un recuperacion di 55%. Esey ta danki na e cantidad grandi di turistanan cu a bin Aruba e ultimo tempo. Na Mei a mira 70 mil turista na Aruba, cual ta algo hopi bon. Ainda nos no ta na 100%, nos ta na 55% aworaki, y si e tendencia aki continua e ora ey, pa fin di aña nos ta cera cu un recuperacion di 68% di nos turismo”, Minister Presidente a subraya. E dignatario ta considera esaki un recuperacion hopi positivo caba.
“Mi kier para keto un rato na e hecho cu nos a ricibi barconan crusero. Diaranzon ultimo, nos tabata tin e prome barco crusero desde 15 luna. 13 di Maart, aña pasa, e mesun fecha cu nos a haya e prome dos casonan di covid-19 na Aruba, tabata e ultimo fecha cu un barco cu turista a yega Aruba y a sali for di nos wafnan, cu turista abordo. Nos tin mas barco crusero para akinan, pero nan ta manera parkea akinan sin turista”, Prome Minister a comenta.
E dignatario a expresa cu ora cu e barco crusero a drenta, siman pasa, e tabata un emocion cu henter pueblo a sintie.
“Pasobra cu despues di 15 luna, dia cu nos a cera nos fronteranan, nos no tabata sa ki dia nos ta bay habri bek na normalidad. Y aworaki, nos ta mira cu poco, poco, e normalidad ta bolbiendo. E barco a drenta, y tin hopi protocol ‘in place’. Por ehemplo, solamente hendenan cu ta vacuna por ta riba e barco, nan ta haci testnan tambe, regularmente, y asina nan a bin constata despues cu el a sali for di Aruba cu tabata tin dos persona asintomatico, cu tabata positivo. Kiermen, nan no tabata tin ningun sintoma pues, e chens pa pega otro hende tabata minimo”, Minister Presidente a menciona.
El a agrega cu mesora e protocolnan a bin “in place” pa asina minimiza e posible riesgonan. E dignatario a bisa cu tur esaki lo contribui na e exito cu e turismo crusero por trece pa Aruba, bek.
“E barco ta bin bek cada dos siman, y cu esaki nos ta bisa cu nos ta cuminza bek cu e recuperacion riba e area di turismo crusero. Ohala cu otro barconan lo por sigui pronto y cu poco, poco nos por bay bek na normalidad”, Prome Minister a remarca.
