ORANJESTAD (AAN): Por a tuma nota cu tabata circula algun noticia relaciona cu incertidumbre cerca un aerolinea hulandes.
E noticia aki a keda descarta ora cu e aerolinea TUI a informa diahuebs cu nan lo cuminsa bula 14 biaha pa siman pa e area di Caribe Hulandes. Esaki lo tuma lugar entrante 1 di Juli proximo.
Esaki sigur ta un bon noticia ya cu esaki ta nifica un apertura completo pa e mercado europeo cu tabata basta limita door di e pandemia.
Awor poco poco e mercadonan ta cuminsa habri pa Aruba y otro islanan den e region ya cu ademas di Hulanda tambe a tende cu e buelonan for di Inglatera tambe lo wordo reanuda.
TUI ta masha emociona cu e hecho cu nan lo bula 14 biaha pa siman ya cu esaki nunca a yega di pasa.
Awe diabierna, e frecuencia lo aumenta na 9 buelo semanal y entrante 1 di Juli e lo bira 14 pa siman. E capacidad adicional aki mas tanto lo beneficia Corsow y Bonaire.
Di e 14 buelonan, 13 buelo lo ta pa Corsow. Ta trata di 5 buelo directo y 9 buelo combina. Bonaire lo tin 7 buelo pa siman y Aruba 3.
Corsow, Bonaire y Aruba ta beneficia particularmente pa e hecho cu otro destinonan caribeño manera Mexico y Republica Dominicana ainda no ta posibel.
