Prome Minister Mike Eman ta destaca balor di preserva nos monumentonan y mantene comunitarismo

Apertura di Open Monumentendag 2026

ORANJESTAD (AAN): Savaneta a bira e centro di celebracion di historia, cultura y patrimonio durante apertura oficial di Open Monumentendag 2026. E actividad, organisa pa Stichting Monumentenfonds Aruba den colaboracion cu Fundacion Savaneta y Departamento di Cultura Aruba, a reuni nos baluartenan, representantenan di organisacionnan, agrupacionnan cultural y comunidad pa celebra e herencia historico cu ta forma parti esencial di identidad di Aruba.

E apertura a tuma luga na FUNARI y a cuminsa cu un acto simbolico, caminda un yabi representando Stichting Monumentenfonds Aruba a wordo traspasa di man pa man entre e hobennan, e baluartenan di bario,  Prome Minister Mike Eman y representante di e organisacinan envolvi. E acto a simbolisa e responsabilidad comparti pa habri porta pa nos historia y pa sigui preserva nos patrimonio pa e generacionnan cu ta bin.

Director di Stichting Monumentenfonds Aruba, Petra Davids a habri e programa mainta, unda el a destaca cu e fundacion ta doño di 19 monumento proteha y ta responsabel pa nan cuido, maneho y mantencion. Ademas, e fundacion ta organisa diferente actividad durante aña cu e meta pa promove concientisacion y educacion tocante nos monumentonan. Davids a enfatisa cu Open Monumentendag ta un di e actividadnan mas importante den e esfuerso aki. Como organisacion relativamente chikito, colaboracion cu varios partner ta indispensabel pa logra e metanan di Monumentenfonds Aruba. E directora a indica cu e edicion di e aña aki ta pone enfoke riba Savaneta, un luga cu tin balor historico excepcional pa Aruba. Savaneta tabata e prome centro di gobernacion di nos isla y ainda awe ta conserva monumentonan historico, paisahenan cultural y tradicionnan cu ta forma parti importante di nos identidad nacional.

Durante su discurso, Prome Minister Mike Eman a expresa gratitud na Petra Davids awor den su funcion nobo como director na Stichting Monumentenfonds Aruba. Tambe el a reconoce e trabou importante cu Monumentenfonds Aruba ta realisa pa preserva patrimonio historico y cultural di Aruba. E mandatario a gradici tambe Norman Thijsen y Fundacion Savaneta pa e trabou cu nan ta desplega den incentiva comunitarismo.  “Renovacion ta importante pa garantisa cu manana nos por restaura nos edificionan,” Prome Minister Eman a expresa.

Den su discurso, e mandatario a amplia e concepto di monumento mas leu cu e edificionan historico solamente. Segun el, Aruba tin su monumentonan den forma di cas, scol y edificio, pero tambe den forma di e personanan cu a dedica nan bida na comunidad y pais. “Mescos cu nos tin monumentonan den forma di edificio, scol y cas, nos tin e monumentonan tambe den forma di personalidad,” Prome Minister Eman a bisa. Den e contexto aki, el a rindi homenahe na ex-Gobernador Fredis Refunjol y na otro baluarte cu, door di nan carera, dedicacion y amor pa Savaneta y Aruba, a inspira e generacionnan nobo. Prome Minister Eman a conclui su mensahe cu un yamada pa sigui consolida e forsa di nos comunidad. Den un tempo caminda hopi hende ta ocupa cu nan responsabilidad, carera y ambicion, el a destaca importancia pa sigui duna atencion na otro, aprecia otro y fortalece e sentido di comunidad cu ta uni nos como pueblo.

Despues di e acto protocolario, e publico a disfruta di un programa cultural cu participacion di e agrupacionnan di scouting, artista local, grupo di baile y diferente organisacion cultural. E programa a pone enfasis rib’e rikesa cultural di Savaneta y e balor di patrimonio como parti bibo di nos identidad nacional.

Open Monumentendag 2026 ta brinda comunidad e oportunidad pa descubri, aprecia y celebra nos monumentonan, historia y tradicionnan. Cu Savaneta como punto central di e edicion aki, e evento ta reafirma e importancia di preserva patrimonio historico y cultural pa beneficio di e generacionnan presente y futuro.