ORANJESTAD (AAN): Aruba Airport Authority N.V. (AAA) a yama bonbini na Prome Minister Hulandes Rob Jetten pa un bishita oficial na Aeropuerto Internacional Reina Beatrix,
dunando un bista mas di acerca riba e programa di expansion Gateway 2030 y operacionnan di U.S. CBP (Customs & Border Protection).
E bishita a destaca e inversionnan continuo di Aeropuerto di Aruba pa mehora e experiencia di pasahero, eficiencia operacional, sostenibilidad y conectividad internacional a traves di e programa di expansion Gateway 2030 cu ta mehora e experiencia di pasahero significantemente.
Durante su bishita, Prome Minister Jetten a haci un recorido den e U.S. Check-In Hall nobo, cu a habri na april 2025 como parti di Fase 1A di Gateway 2030. E delegacion tambe a haci un bishita na e sistema nobo di maneho di maleta, cu tin capacidad pa procesa te cu 2.000 maleta pa ora, mehorando e rendimento y fluho di maleta, cu lo haci e experiencia di e pasahero mas eficiente y moderno.
Adicionalmente e delegacion a ricibi un actualisacion riba Fase 1B, cu ta den construccion actualmente cerca di Gate 8, cu lo introduci tres boarding bridge, sala di espera mas grandi y espacionan comercial y gastronomico diseña pa mehora e comodidad di e pasahero ainda mas.
Un aspecto clave di e bishita tabata e operacion di Aruba su U.S. CBP Pre-clearance y e beneficionan cu e ta brinda na e pasaheronan cu ta biaha pa Merca. Aruba ta keda un di e poco aeropuertonan den region caminda e pasaheronan ta completa formalidadnan di Inmigracion, Aduana y siguridad di frontera di CBP di Merca prome cu nan salida, locual ta permiti e pasaheronan yega Merca como pasahero domestico.
AAA a mustra con e proceso simplifica aki ta mehora e comodidad di e biaheronan, optimalisa e fluho di pasahero y ta fortalece e posicion di Aruba como un porta di entrada internacional competitivo y eficiente.
Door di demostra Aruba su modelo exitoso di U.S. CBP Pre-clearance, AAA tambe a destaca e potencial pa solucionnan similar di procesamento di Aduana y frontera cu un dia lo por beneficia e biaheronan Europeo tambe. Avancenan asina por permiti e pasaheronan completa e procesonan di Imigracion y Aduana prome cu nan salida, creando un experiencia di yegada mas lihe y sin problema na nan destinacion final.
E delegacion a bishita tambe e facilidadnan di U.S. CBP Preclearance existente, cu ta programa pa inicio proceso di remodelacion den Fase 2 di Gateway 2030. E fase aki lo inclui instalacionnan di check-in mas amplio pa vuelonan nacional y internacional, areanan nobo di proceso di Imigracion y siguridad, instalacionnan di U.S. CBP Preclearance modernisa y un area comercial nobo y area pa cuminda y bebida.
“Ta e intencion pa Gateway 2030 prepara Aeropuerto di Aruba pa futuro mientras continuamente ta mehora e experiencia di biahe pa tur pasahero,” segun Jonny Andersen, CEO di AAA. Andersen a continua bisando cu: “Nos tabata honra di por yama Prome Minister Jetten bonbini y lag’e mira e progreso cu nos ta haciendo pa fortalece Aruba su conectividad, eficiencia operacional y experiencia di pasahero.”
