Prome Minister Evelyn Wever-Croes tambe a celebra aniversario y apertura di Bold Properties Aruba

ORANJESTAD (AAN): Riba dia Internacional di Hende Muhe, a tuma luga e celebracion di e prome aniversario y apertura di e oficina nobo di BOLD Properties Aruba.

BOLD Properties Aruba ta un compania di "real estate" cu ta consisti di un team di solamente hende muhe lidera pa Aileen Kelly y Jennifer Figaroa. 

   Como invitado, Prome Minister Evelyn Wever-Croes tabata presente pa comparti e momento special aki cu e team y invitadonan. Prome Minister a expresa cu e logro aki sigur ta un inspiracion pa tur hende muhe, y pa nan realisa cu tur loke nan propone nan mes, nan por logra cu fe y determinacion.

   “E damanan aki a drenta un mercado estableci caba pasobra ta hopi compania renombra  tin na Aruba cu ta haci e trabao di "real estate", pero nan a bin cu determinacion y na un manera hopi innovativo, uzando medionan social.  Awe cu orguyo nan ta celebra nan prome aniversario y sigur hopi mas den futuro”, Prome Minister a remarca. 

   Prome Minister ta felicita Aileen Kelly, Jennifer Figaroa y e team completo di BOLD Properties Aruba cu nan prome aniversario,  y ta spera cu esaki ta un ehempel y inspiracion pa cada hende muhe aki na Aruba.