Segun Kinsasha Thielman-van der Bliek:
- E proyecto tin impacto hopi negativo
ORANJESTAD (AAN): Segun señora Kinsasha Thielman-van der Bliek, proyectonan manera e Agri-Innovation Park tin impacto grandi riba medio ambiente y ta pidi pa Prome Minister Mike Eman, Parlamento y organizacionnan y instancianan cu di berdad kier defende y proteha nos medio ambiente, pa cuminsa tuma nota di e tipo di proyectonan cu berdaderamente tin impactonan negativo riba nos medio ambiente.
Señora Thielman-van der Bliek a remarca cu berdad ta hopi importante pa nos cuida nos flora y fauna. “Ta necesario pa cuida nos naturalesa y sa kico por mishi cu ne y kico no y con pa ta cauteloso y cu mas respet cu medio ambiente, pero si di berdad nos kier proteha nos medio ambiente, nos tur mester tin e capacidad di comprende e impacto di e proyectonan grandi aki den su profundidad, no solamente pa presente pero tambe a termino largo”, señora Thielman-van der Bliek a enfatisa.
E impactonan aki, segun señora Thielman-van der Bliek, no ta wordo sinti di awo pa mañan, sino mas despues y e consecuencianan lo pasa e grens na unda cu e lo bira ireparabel.
Tambe señora Thielman-van der Bliek ta urgi Parlamentarionan cu di berdad ta stima y ta preocupa cu nos medio ambiente, pa carga e topico aki den Parlamento y haci nan trabao pa controla Minister Geoffrey Wever cu kier desaroya a proyecto aki.
El a menciona cu cartanan a bay pa Parlamento y pa Prome Minister Mike Eman tocante su preocupacion pa cu e proyecto aki. Segun e, Prome Minister Eman no solamente tin e responsabilidad sino obligacion pa revisa e proyecto Agri-Innovation Park y den su funcion di minister di medio ambiente, e tin cu tuma accion pa salbaguardia y proteha nos naturalesa y medio ambiente.
