Cu elogio na Prome Minister Eman
ORANJESTAD (AAN): Durante un rueda di prensa na Nieuwspoort,Prome Minister di Hulanda Rob Jetten a expresa su aprecio pa Prome Minister di Aruba Mike Eman, kende a participa pa ultimo biaha den un Rijksministerraad como premier di Aruba. “Mike Eman ta un colega y Prome Minister di Aruba hopi aprecia. E ta forma parti di un tradicion di cinco generacion cu a contribui na un isla cu a bira mucho mas consciente di su mes, cu a inverti den un economia fuerte, pero cu tambe tin bista pa esnan mas vulnerabel den sociedad”, Jetten a declara. E premier di Hulanda a destaca tambe, Eman a laga un mensahe importante durante su despedida, enfatisando cu den Reino nos ta mas fuerte hunto y cu semper mester busca manera pa sigui dilanti hunto.
Relacion entre Aruba y Hulanda
Jetten a expresa su optimismo cu e generacion di politico nobo na Aruba lo sigui fortalece e relacion entre Aruba y Hulanda. El a destaca cu e situacion geopolitico den region, particularmente rond di Venezuela, ta muestra di e importancia di cooperacion entre e paisnan di Reino.E Prome Minister Hulandes a menciona specificamente cooperacion riba tereno di siguridad y diplomacia, y a expresa su aprecio pa e contacto directo cu Gobierno di Aruba durante e ultimo luna.
Aprecio pa vision economico di Eman
Durante e rueda di prensa, Jetten a remarca tambe tocante e iniciativanan di Eman pa fortalece e economia Arubano, entre otro cooperacion cu Wageningen University & Research (WUR) y e posibilidadnan di cooperacion cu HVC riba tereno di procesamento di desperdicio.Jetten a indica cu, aunke Aruba ta conoci internacionalmente como “One Happy Island” y tin un sector turistico fuerte, ta importante pa diversifica e economia y explora otro oportunidad. Segun Jetten, cooperacion cu e institucionnan di conocimento y comercio Hulandes hunto lo por contribui na prosperidad economico di Aruba cu na su turno lo tasnforma den bienestar di e pueblo Arubano.
Combati pobresa y salario minimo
Prome Minister Jetten a reconoce tambe cu e ta sigui di cerca e desaroyo na Aruba pa locual ta e discucion riba aumento di salario minimo. E la resalta cu costo di energia, comestibel y vivienda ta halto na e islanan autonomo di Reino Hulandes, pues Aruba, Corsou y Sint Maarten. El a destaca cu inversioneconomico conhunto lo por contribui na trece mehora den e nivel di calidad di bida y e bestaansminimum.
E rueda di prensa a termina cu e reflexion di Jetten riba e mensahe di Eman: cu e paisnan den Reino mester sigui busca oportunidad pa traha hunto y fortalece nan futuro.
