ORANJESTAD (AAN) — Prome Minister, Evelyn Wever-Croes, na apertura di e localidad nobo pa Departamento di Mucha y Hoben (DMH),
Diabierna 1 di November atardi, a bisa cu DMH no tabata solamente e idea di un mandatario, pasobra nada ta logra na Aruba, cu solamente e idea di un persona.
“E tabata un cooperacion y un colaboracion hopi grandi y hopi extenso, di 20 diferente partner, riba un total di 31 proyecto cu e meta di mehora y reforza e sistema nacional cu nos tin, pa proteccion di nos muchanan”, e dignatario a subraya.
E LOGO:
Minister Presidente a para keto un rato na e logo di e Departamento di Mucha y Hoben , cu ta un logo cu ta sali di e Crisis Plan Social, esencialmente su colornan, cu tur tin un significacion y un simbolismo hopi importante, principalmente color y simbolismo ta pa duna un contenido y un inspiracion nacional, pa tur hende aki na Aruba sinti nan mes identifica den dje.
“Y esaki ta pa corda nos cada un, e origen y e situacion cu nos, como pais, tabata aden y cu nos nunca mas kier yega na e punto eynan. For di e cuater mannan cu tabata tin den e Social Crisis Plan, a scoge un di e mannan cu lo sigui tene nos muchanan y nos hobennan na halto, pa sigui enfatiza e compromiso di tur instancia, y cu ta simboliza e union y cooperacion mutuo pa enfrenta e retonan p’asina nos percura di por brinda nos mucha y hobennan e proteccion, pa nan por tin un miho mañan”, Minister Presidente a indica.
E COLORNAN:
MAGENTA ROSE: E dignatario a splica cu a uza e color magenta rose, cu ta representa armonia, amor, compasion, cooperacion y respet propio.
AQUA BLOU: El a splica cu e escudo di color aqua blou ta representa e sistema di proteccion nacional, pa nos mucha y hobennan, cu mester ta ekipa cu sabiduria, balance emocional, intuicion y imaginacion.
“E aqua blou tambe ta pa inspira nos profesionalnan y nos comunidad, pa nos ta leal, sincero, confidente, inteligente y cu curashi, ora nos bisa di berdad, no kier proteha y salvaguardia nos muchanan y nos hobennan, cu ta un grupo vulnerable den nos comunidad”.
E MAN HABRI PA ALCANZA UN STREA: Minister Presidente a referi na e mucha, e hoben, cu man habri y tratando di alcanza un strea, cual ta representa nos simbolo nacional riba nos bandera.
“E strea geel ta simboliza e compas moral cu nos kier pa e mucha alcanza, cu e guia di esnan cu ta na su encargo, riba un caminda di bida yena cu trankilidad, positivismo, felicidad, prosperidad, speranza y relahacion.
COLOR BLANCO: “Y sin laga afo e detaye principal di e mucha y hoben, den e color blanco unda su curazon y voz ta resalta, ta representa e forma di mas puro di amor, inocencia, y di paz pa existi, y cu nan merece di tin akinan, riba nos Isla, sin ningun tipo di discriminacion”, Minister Presidente a expresa.
