ORANJESTAD (AAN): Dia 8 di november Prome Minister Evelyn Wever-Croes a reuni cu un delegacion di IMF International Monetary Fund cu ta na Aruba den cuadro di normanan financiero.
Na April 2024 a acorda cu Hulanda cu Aruba lo traha pa yega na un rijkswet pa asina wak si por baha e interes cu ta pagando riba e debe cu Aruba tin cu Hulanda. Ya Gobierno a yega na un acuerdo unda e interes inicial a baha di 6.9% pa 5.1%. Pero a keda palabra cu si por yega na un otro sistema di un supervision financiero mas moderno, e ora e interes por baha aun mas te na 3.4%. E negosacionnan ta andando y den esaki a palabra cu Aruba ta bay pidi IMF ayudo pa yega na normanan financiero.
Hunto cu IMF, Gobierno ta trahando riba cua ta e miho normanan. Aruba tin varios norma caba cu Hulanda a impone. Un di nan ta cu Aruba mester tin un surplus di 1% tur aña y esaki ta ancra den ley. Tambe ta ancra den ley cu e placa ey di e surplus mester bay pa paga debe. Aparte di esey, awor ta ancra den ley, cu si riba e surplus di 1%, por ehempel si esaki ta 70 miyon florin, y riba di dj’e Aruba tin mas surplus y e ta 100 miyon florin, e ora e diferencia cual ta 30 miyon, mita di esey tambe mester bay pa paga debe y e otro mita por bay den inversionnan. E debe di Aruba tawata hopi halto prome cu pandemia, y a crece durante pandemia pero ya e debe a baha hopi paso Aruba ta cumpli cu pago di su debenan debidamente y pa esaki tambe IMF a elogia Gobierno.
Un di e normanan cu Aruba tin ta cu gasto di personal di Gobierno no por ta mas cu 10% di e GDP. Otro norma ta cu e debe di Aruba mester yega 50% na aña 2040, aunque tur cos ta mustra cu prome cu aña 2040 Aruba lo cumpli cu esey. Y otro norma ta cu no mag di tin proyectonan PPP (Public–Private Partnership) y asina tin mas norma cu Gobierno ta aplicando. IMF ta recomenda pa bay cu un set di norma hopi senciyo, pa asina tur hende por compronde unda Aruba ta bayendo y pa esaki Gobierno ta hopi gradecido.
Durante e reunion IMF a elogia Gobierno di Aruba y Minister di Finansa, Xiomara Maduro y su team pa e maneho financiero responsabel. IMF a indica cu ta trata di un team bon prepara, serio y cu pasion grandi pa e tereno aki. Un preocupacion di IMF ta riba e falta di personal den e departamento aki y ta mustra riba e importancia di tin mas personal pa asina Aruba por “haal in” atrasonan. Un punto valido cu Gobierno tin cu traha riba dj’e den e espacio financiero actual.
“Actualmente IMF ta papiando cu tur stakeholders riba tereno di finansa y otro siman nan ta emiti nan conseho, nan rapport cu ta loke ta bay yuda nos finalisa negociacionnan cu Hulanda. Ohala e ora nos por yega na baha e interes na 3.4% pa asina resta mas espacio financiero pa nos por trece mas alivio den comunidad y haci inversionnan necesario”, Prome Minister a expresa.
