Vocero policial ta alerta mayornan:
*Hopi ta core meymey di caminda y ta pone nan mes den peligro
ORANJESTAD (AAN) – Vocero di Polis, señora Liliana Rasmijn, den entrevista cu DIARIO, a elabora tocante e forma con hopi mucha ta uza e-bike of stap riba caminda.
Rasmijn ta corda cu e ultimo morto den trafico tabata riba un step (E-bike) unda cu ta wordo cuestiona con nan por ta riba caminda. “Corda bon, tur cos mester wordo cambia segun ley. E ta wordo movi pa un motor pero segun DTI e mester tin tanto peso, mester pasa tanto peso pa e por tin un plach'i number, pues ta cosnan cu ami ta kere cu den futuro mester wordo regla bon den ley”, Rasmijn a señala.
El a referi tambe na e fenomeno cu tin aworaki, cu tin hoben cu ta uze como medio di transporte, pero e manera con nan ta uz'e riba caminda tambe ta pone nan mes den peligro, pues na luga di nan core mas banda recht nan ta core meymey di caminda.
“Of tin di nan hasta ta haci locuranan riba nan. Pues, abo como mayor, pasobra e mucha no por yega na un di e steps aki pasobra nan tin un balor. Abo como mayor cu ta cumpre, por ta pa e mucha por move miho, sea conciente, papia cu bo yiu, zorg pa e tin un helm, zorg pa bise e reglanan di trafico, corda cu anochi mester tin un luz riba dje, tambe. Y si e ta uz'e pa scol, ta den dia. No uz'e pa e mucha transporta su mes di un lugar pa otro. Tin biaha nan ta bay camindanan largo, tin biaha bo ta uz'e den e caminda cortico cerca di cas, enbes di cana lag'e tin step. E tin su peligronan cu ne y esey ta un fenomeno cu nos ta observa”, Liliana Rasmijn a comenta.
Rasmijn a señala cu e ta kere cu Alto Mando tambe, mester keda papi'e cu Minister pa por yega na un solucion kico ta bay pasa cu e fenomeno aki.
“Manera mi ta bisa, tambe na hotelnan turistanan ta yega pone nan 'credit card' y nan ta bay. Eigenlijk, e no mester ta riba caminda pero e acera ta pa peaton. Pues mester bin un beleid, p’asina nos por centralisa kico ta bay pasa cu e fenomeno di E-baisnan aki”, Liliana Rasmijn a remarca.
