Prome Minister a priminti di studia asunto di Colegio Arubano y reuni cu e docentenan pronto

ORANJESTAD (AAN): Prome Minister demisionario Evelyn Wever Croes Diahuebs atardi na Bestuurskantoor a ricibi un carta di e docentenan di Colegio Arubano,

kendenan mirando e manera di funciona y actua di bestuur di SVOA, ta pidi pa nan retiro.

Despues di ricibi e carta unda cu ta bisa tambe cu e docente y demas empleado no ta wordo trata debidamente, Prome Minister a bisa cu mirando cu e no conoce detayenan di e caso, e ta bay tuma su tempo pa studia esaki y yama e docentenan bek pa un reunion.

“No ta bay ta ainda mayan, pero Dialuna of Diamars sigur, pa asina mi studia tur cos bon y wak kico ta e camindanan cu tin cu wordo cana”.

Ora cu SIMAR a tuma contacto cu mi, mi no por a kere cu na e altura aki cu nos ta cabando un aña escolar, nos ta pasando den esaki.

Keremi mi lo haci di mi parti mas tanto posibel pa handle e lihe, segun e Prome Mandatario.

El a splica si cu mirando cu ta trata di un gobierno demisionario desde 30 di Maart, gobierno pues desde 30 di Maart no por tuma decisionnan cu ta haci cambionan grandi den maneho di ningun gobierno.

Segun Wever Croes, ta e minister nobo cu sinta mester atende cu cambionan structural.

“Unico cos cu nos tin autoridad pa haci ta wanta cabez riba awa y pa nada bay malo, pero no bin cu cambionan grandi”, segun Prome Minister.

El a indica cu despues cu e studia e caso bon, lo tuma contacto cu SIMAR pa e ora ey nan bin cu un delegacion cu ta inclui e maestronan pa reuni cune.

“Mi ta lamenta cu boso ta pasando den esaki, mirando cu debi na e pandemia boso tabata tin 2 aña escolar hopi duro y e manera con boso a atende cu esaki tabata sublime”, segun e mandatario.