Su di seis aña haciendo esaki
- Pueblo por download y lesa e Relato Anual
ORANJESTAD (AAN): Diahuebs mainta durante un conferencia di prensa convoca door di Gobierno, a toca turno di Prome Minister Evelyn Wever-Croes pa presenta e “Jaarverslag di 2023” di su ministerio.
Esaki pues ta Relato Anual 2023 di su ministerio di Asuntonan General, Innovacion, Organizacion Gubernamental, Infrastructura y Planificacion Teritorial. E relato aki ta mustra un resumen di e trabaonan ehecuta durante aña 2023.
Prome Minister a remarca cu e Relato Anual ta un relato cu su persona ta bin ta trahando caba desde e prome aña di Gabinete Wever-Croes. Na fin di aña 2018 a publica e prome Relato Anual y despues tur aña a sigui public’e y esaki ya ta e di 6 aña cu ta publica esaki.
E Relato Anual ta cuminsa cu un pre-ambulo unda ta duna splicacion con aña 2023 a bay 3 aña despues di Covid. Un aña di ‘Union y Positivismo’ na unda cu pueblo di Aruba en general a demostra su fortalesa pa logra un solo meta. Despues ta sigui 4 capitulo.
(1) Asuntonan General.
(2) Innovacion.
(3) Organizacion Gubernamental.
(4) Infrastructura y Planificacion Teritorial.
Pa conclui e Relato Anual, Prome Minister ta duna un bista di su ministerio pa aña 2024 y con pa continua.
Relato Anual 2023 a worde presenta na Parlamento y na Gobernador y na e departamentonan concerni. Y pueblo di Aruba completo tambe por haya Relato Anual 2023 riba e Plataforma di Facebook di Gabinete Wever-Croes. Por obtene esaki tambe riba pagina online di BUVO of via e website aki:
“Esaki ta e di 6 aña consecutivo cu mi ministerio ta publico e Relato Anual di e trabaonan di e departamentonan cu ta resorta bou di mi ministerio y especialmente e retonan cu ta worde encontra ainda tur dia y con nan ta atende cu esakinan. y esaki ta un legado cu nos ta laga atras pa e futuro generacionnan pa informa kico nos ta haci, hacienda y con nos ta atende cu e retonan.
Mi ta gradici tur esnan cu a yuda nos traha riba e Relato Anual 2023. Tur e departamentonan cu ta resorta bou di mi ministerio cu a duna nan relato y input. Danki pa boso cooperacion di tanto departamentonan y di mi ministerio cu a yuda compila tur informacion y traha un hopi bunita layout pa asina e ta mas atractivo tambe ora cu download y repas’e”, Prome Minister Evelyn Wever-Croes a expresa.
