Prioridad eleccion 2025 ta keda garantisa sistema di democracia
*Porcentahe di politico dilanti Mesa Berde ta preocupacion serio
*Prome cu eleccion ya Huez a spierta AVP pa kiebra di democracia
ORANJESTAD (AAN) — Cu entrada di luna di Mei 2024, Aruba a subi e caminda pa eleccion pa Parlamento na 2025.
E desaroyonan den mundo politico di Aruba, ya prome cu e eleccion actual, a duna tur motibo pa ta sumamente cauteloso, cu loke ta pasa riba tereno politico cu Aruba, cu na 2014 a bira victima di e gobernacion di Mike Eman, den cual Hulanda mester a interveni pa scapa Florin Arubano, mientras ya e Avestrus di Bnny Sevinger tabata tin neishi den uno di e scandalnan mas grandi cu Aruba a conoce, cu tabata e forma cu family and friends a haya tereno, mientras e Arubiano cu no tabata por a participa den e fiesta di piñata di Benny Sevinger, condena pa Huez, no a haya tereno pa e traha un cas pa e por tin un dak riba su cabez.
Aruba ta prepara pa na Mei 2025, pues dentro di poco dia, mira e presentacion di e Caso Avestruz den Corte di Apelacion.
Berguensa ta cubri Aruba cu e hecho cu e lider di AVP, Mike Eman, a prefera kiebra di su partido, riba exigi Benny Sevinger pa despues cu el a wordo condena dor di Huez, entrega su asiento den Parlamento.
E caso di Benny Sevinger proximamente den Corte a wordo presidi pa e caso di Paul Croes, cu a wordo sentencia na prison pero tambe na pago di un suma di placa, debi na e acusacion cu el a haci su mes culpabel di labamento di placa, loke el a rechasa.
Ayera pues den Corte di Husticia a wordo dicidi, manera den otro articulo ampliamente ta wordo atende, cu ta mantene e hecho cu Paul Croes mester paga un suma di placa, pero a baha e suma.
Esaki ta nifica luna di Mei 2024, ya en espera di e caso di Benny Sevinger, ayera a mira Paul Croes ta scucha sentencia den Corte di Husticia.
E cantidad di casonan di politiconan cu a wordo condena na prison den historia di Aruba y e scandalnan cu a bini dilanti, ta haya atencion di publico, cu mas y mas ta trece dilanti, cu e cantidad di casonan di politiconan den problema cu Husticia sigur mester haya atencion debi na e porcentahe cu e ta alcansa.
Informantenan ta indica cu a bira tempo pa tuma pasonan mucho mas drastico contra politiconan cu ta abusa di e confiansa di Pueblo y ta haci nan mes culpabel na casonan di corupcion of abuso di nan funcion.
Manera a dilanti, mester mira cuanto gobernante tin y cuanto caso a wordo presenta dilanti Huez.
Informantenan a indica cu awor mas motibo ta wordo duna na Reino pa exigi pa Aruba conoce un Ley di Reino pa supervision financiero di e pais.
Na mes momento ta mustra cu mester cuminsa revisa leynan pa participacion electoral y castigonan cu ta wordo duna na gobernantenan.
A wordo mustra na DIARIO cu e cantidad di politiconan cu ta aparece dilanti Mesa Berde mester wordo mira enfrente e cantidad total di casonan den cual dirigentenan di empresanan ta faya cu maneho di nan negoshi. E preocupacion serio ta, cu casonan manera di Benny Sevinger y Paul Croes, ta afecta directamente e cara di Aruba pero tambe ta afecta e balor di democracia na Aruba pasobra ta abuso di e proceso democratico, ta conduci na criminalidad den sector politico.
Na caminda pa eleccionnan nobo, ta wordo insisti pa den Parlamento atende cu e defensa di democracia, cu a wordo segun Huez tambe amenaza for di campaña politico dor di partido AVP, cu a entrega na Huez e prueba cu AVP ta kibra e secreto di voto ya cu el a entrega portret di formulario di voto cu e decision ariba, na Huez.
Aruba ta na caminda pa eleccion 2025 segun informantenan cu a mustra nan preocupacion serio pa loke ta pasa den seno politico y ta di opinion, cu den sala di Corte di Husticia a wordo presenta na publico e realidad di bofon y abuso cu ta wordo haci di democracia den seno politico, manera e casonan contra Paul Croes y Benny Sevinger na Mei 2024 sigur ta prueba.
Informantenan ta di opinion cu un estudio mester wordo haci pa oficialmente determina te ki grado por considera politica aparentemente, e empresa (cu ta den e caso aki e maneho di Pueblo), cu segun porcentahe, e indice mas halto di criminalidad, condena pa Huez. Un pregunta cu mester wordo contesta y sigur presenta cu e actitud cu cada partido a asumi ora personanan di nan partido mester a aparece dilanti Huez.
