Prome Minister a hiba palabra en conexion cu cendemento di luz oranje dilanti Bestuurskantor

ORANJESTAD (AAN) – Diabierna pa 6’or di atardi, a tuma lugar dilanti di Bestuurskantoor, e ceremonia di iluminacion di luz oranje,

den cuadro di e Dia “Internacional pa elimina violencia contra hende muher adulto y mucha muher” y den e contexto di e campaña “Orange the World”.

Lidernan di e diferente fundacionnan concerni cu e lucha contra violencia di genero a hiba palabra, y tambe Prome Minister Evelyn Wever-Croes.

E dignatario a cuminza bisando cu 137 hende muher pa dia, ta perde na bida debi na violencia di relacion. No na Aruba, pero mundialmente. Esaki ta 1 cada 18 minuut. Na Aruba, e mandatario a expresa, lamentablemente tin hendenan muher victima di casonan di abuso, violencia den relacion, y tin cu a perde nan bida.

E dignatario a expresa cu el a worde hopi conmovi ora e tabata den Cas di Cultura, y a tende historia di tur e hendenan muher cu a perde nan bida debi di ta den un relacion violento; y tambe tabata tin un Arubiano den e exhibicion.

El a splica cu e ta un exhibicion hopi diferente. E ta un exposicion di paña di hende muher colga den un sala, y e yama “she is gone”. E hende muher no tey mas, e dignatario a expresa; su paña a keda. Tin e caso di Natasha, un Arubiano cu a perde su bida tres aña pasa, y el a worde asesina door di su ex-pareha dilanti su yiunan. E mandatario a comenta cu Natasha su yiunan tabata presente den e exposicion y su ruman, y nan a comparti e historia cu e publico.

“Mi lo kier pa awe ta e comienzo di e 16 dianan di activismo, e aña aki nos ta cende luz y ohala cu e luz oranje cu  nos ta cende y tur caminda cu nos ta plama e luz orange nos por aumenta concientizacion. Tur hende cu mira e luz oranje ta corda bo cu nos tin un responsabilidad pasobra hopi hende rond di nos, cerca di nos por ta pasando den algo asina. Tin un tempo cu nos a bisa ‘nos no ta mete den bida di hende’ pero imagina bo si bo mete y bo salba un bida; un mama di dos mucha chikito. Kiermen, laga e aña aki, nos dicidi pa nos mes cada un cu a bin akinan ta comprometi na e causa. Y ban parti esaki cu mas hende. Unda cu nos wak sea e man oranje, e luz oranje, e paña oranje, e cinta oranje cu esey ta pa recorda nos di nos compromiso cu mester caba cu violencia relacional”, Premier Wever-Croes a expresa den e prome parti di su discurso.