Prome Minister a haci un recorido riba e tereno di Refineria di Aruba

ORANJESTAD (AAN): Diaranson mainta, Prome Minister Evelyn Wever-Croes a haci un recorido riba e tereno di RDA (Refineria di Aruba) pa

mira asina diferente aspectonan di e refineria y proyectonan cu ta worde planifica door di DOW.

   Un di e proyectonan ta un caretera cu a worde proyecta ya un par di aña pasa. E caretera lo pasa a traves di e tereno di e refineria y yega na e area di Colony, Baby Beach y Rodgers Beach y na Secrets Hotel mas lihe. Prome Minister diaranson mainta a haci un ‘site visit’ pa asina haya splicacion amplio di e Proyecto aki.

   E mandatario a remarca cu tabata un mainta cu hopi informacion interesante. Por a mira tur e posibilidadnan y lo sigui traha y studia e proyecto aki y mira si tin necesidad di un caretera asina pa conecta e centro di San Nicolas mas lihe y mas efectivamente cu e area turistico cu ta den desaroyo aworaki.

   “Mi por bisa cu ta momentonan di melancolia ora pasa door di e refineria y wak con esaki a decai. Pero tambe esey ta mustra e historia di nos pais y awor nos mester concentra riba e futuro di Aruba. Mi ta gradici tur e profesionalnan pa nan tempo y pa tur e informacion cu nan a trece padilanti awe mainta”, Prome Minister a expresa.