Prome Minister a felicita Nea Maduro cu su 90 cumpleaño

ORANJESTAD (AAN): Recientemente señora Cornelia ‘Nea’ Maduro a cumpli 90 aña di edad. Hunto cu Minister Endy Croes, Prome Minister Evelyn Wever-Croes a asisti na e celebracion di bida aki hunto cu señora Nea, famia y amistadnan.

   Nobenta aña sigur ta añanan di experiencia y di pasa conocemento over na generacionnan. Pa yega na e bunita edad aki, ta un bendicion. Celebracion di 90 aña di bida ta un celebracion maraviyoso di un bida bon biba. Señora Nea semper ta un persona hopi alegre y balente cu a traha te mas di su 70 aña.

   E celebracion a bay den un ambiente ameno cu caha di orgel y mariachi cu sigur a contribui na e alegria cu tabata briya riba cara di entusiasmo di señora Nea.

   Prome Minister ta gradici señora Nea y famia pa e oportunidad brinda pa celebra hunto cu nan e bunita edad cumpli di señora Nea. Un pabien grandi y cu señora Nea cumpli hopi aña mas di bida y cu e sigui pasa over e experiencia y conocemento adkiri durante 90 aña na nos hobennan.