Prome Minister a duna discurso na e 'Ministerial Round Table' na Nacionnan Uni

Den nomber di paisnan den Reino Hulandes,

ORANJESTAD (AAN): Un biaha mas, Prome Minister Evelyn Wever-Croes ta lidera e delegacion di Reino Hulandes na e debate general CSW 67, Commission on Status of Women na Nacionnan Uni, New York. Diamars, Prome Minister a participa na e Ministerial Round Table na Nacionnan Uni riba e tema: Good practices in addressing barriers to bridge the gender digital divide and promote education in the digital age for achieving gender equality. Prome Minister a comparti tur loke Aruba ta haciendo riba e tereno aki cu ta su vision di Innovacion desde 2017.

            Prome Minister a enfatisa cu transformacion digital profundamente a impacta bida diario den Reino Hulandes. Transformacionnan a trece cu ne hopi oportunidad pa loke ta trata igualdad di genero pero tambe hopi riesgo. Un preocupacion di esaki ta trece realisacion riba e necesidad pa transforma nos economianan pa futuro pa crece. Pero mientras cu tin intervencionnan directo contra participacion di hende muhe y mucha muhe, inigualdad lo continua.

            Prome Minister a remarca cu despues di e pandemia, no tin tempo pa nos sinta y warda riba cambio. Aruba, como un isla, nos ta realisa cu apesar di nos vulnerabilidad y limitacionnan, nos no por depende mas riba innovacion importa. Innovacion mester cuminsa cerca nos mes. Pa e motibo aki tambe Aruba a tuma accionnan concreto pa ta parti di e solucion y prepara nos generacion hoben pa e futuro mercado laboral. Nos meta ta, pa a traves di FUTURA, nos Lab di innovacion nacional, crea e interes den muchanan muhe pa persigui profesionnan den ciencia, technologia, ingenieria of matematica.

            Universidad di Aruba tambe a establece un programa di Bachelor, Master y PHD cu enfoke riba desaroyo sostenibel pa e islanan chikito den desaroyo (SISSTEM) y actualmente e facultad y e ekipo di docente ta consisti di un participacion di 56% di hende muhe y tambe ultimamente ta mira un crecemento den e participacion di studiantenan femenino y ta casi 50%.

            Iniciativanan similar ta existi na Hulanda. Tecnologia ta drentando mas y mas den scolnan, sector priva y autoridadnan local cu ta inclui e focus pa atrae mas hende muhe y mucha muhe den sectornan STEM. Recientemente, Hulanda a lansa e plan di accion pa empleonan berde y digital cu e meta pa aumenta inversion den habitonan digital, educacion y desaroyo y tambe e cantidad di specialistanan di ITC femenino.

            “Ta mi speransa cu iniciativanan aki, nos por motiva tur hende pa cera e gap di genero. Hunto y cu positivismo, nos por sigura cu tur genero tin oportunidadnan igual y garantisa crecemento inclusivo pa tur hende. Muhenan den liderazgo lo hunga un rol fundamental den esaki. Ta nos, como lidernan, un responsabilidad pa inspira hende muhenan hoben y muchanan muhe y yuda hende muhe avansa tambe den innovacion”, Prome Minister Evelyn Wever-Croes a expresa den su palabranan dirigi durante e Ministerial Round Table na Nacionnan Uni.