Prome Minister a bishita exposicion di 'She’s gone' na Cas di Cultura

En conexion cu Dia Internacional di Eliminacion di Violencia Contra Hende Muhe,

ORANJESTAD (AAN):  n conexion cu Dia Internacional di Eliminacion di Violencia Contra Hende Muhe, diabierna 25 di November, Prome Minister Evelyn Wever-Croes a bishita e exposicion di “She’s Gone” na Cas di Cultura cu a tuma luga dianan 23-26 di November. Un exposicion di hende muhenan asesina pa nan pareha, dirigi riba conscientisacion di e problema di violencia relacional.

            E actividad aki a wordo organisa pa UNHCR den colaboracion cu HIAS, FCVR, Fundacion Respetami y Cedehm, en conexion cu 16 dia di activismo contra violencia contra hende muhe. Mundialmente y na Aruba tambe, lo tuma luga varios actividad pa crea conscientisacion relaciona cu e topico aki. Den su discurso, Prome Minister a enfatisa cu nos cada un por yuda stop violencia contra hende muhe.

            Creando y elevando e nivel di conscientisacion ta aspectonan clave den prevencion di violencia contra hende muhe y mucha muhe. Globalmente, un den cada 3 hende muhe ta experimenta violencia di genero y esaki ta un cifra alarmante. Desafortunadamente, esaki ta pasa na Aruba tambe y nos mester haci prioridad pa detene. Violencia contra hende muhe y mucha muhe ta un di violacionnan di derecho humano di mas prevalente, persistente y devastador y ta afecta miyones di hende muhe y mucha muhe sin importa background, nivel educativo of edad. Violencia ta e pio manifestacion di descriminacion y desigualdad di genero.

            Tin diferente manera pa crea conscientisacion y un di nan ta a traves di arte. Presente na e exposicion tawata e artista Keren Goldstein di Israel kende ta pasa rond mundo pa colecta paña di hende muhenan cu a wordo asesina pa nan pareha, den diferente pais di mundo. Den e expo, e pañanan a wordo colga memey den e sala y na muraya tin potret di e pañanan, potret di e victima na bida bisti cu e paña y su storia. Mas o menos 30 paña y 30 storia. Un exposicion hopi impresionante cu ta haci visibel e realidad duro di e consecuencianan di violencia.

            Tabata tin tambe e caso lamentable di Aruba, Natasha Kock, cu na 2019 a wordo asesina dilanti su dos yuinan. E yiunan tambe tabata tey diabierna durante e exposicion. “E exposicion aki lo no trece nan mama bek, ni lo calma e dolor di e famia, pero por yuda evita mas victima manera Natasha”, Prome Minister a duna di conoce.

            Prome Minister ta encurasha tur ciudadano pa uza e oportunidad cu exposicionnan y e actividadnan cu lo tuma luga ta brinda, pa papia riba e topico aki, e impacto y consecuencianan cu violencia contra hende muhe y mucha muhe ta trece cu ne.

            “Desde 25 november te 10 di december tin e 16 dianan di activismo contra violencia contra hende muhe. Ban haci nos maximo esfuerso pa yuda stop cu violencia contra hende muhe”, Prome Minister Evelyn Wever-Croes a enfatisa.