Prome Minister a atende e conferencia di UN Women tocante abuso contra hende muhe y mucha muhe

ORANJESTAD (AAN): Prome Minister Evelyn Wever-Croes a atende varios reunion na Nacionnan Uni durante Summit of the Future representando Aruba y Reino Hulandes.

   Un conferencia importante cu e mandatario a atende tabata di UN Women “Accelerating Spotlight Initiative's High-Impact Effort to End Violence Against Women and Girls”. Esaki ta trata e hecho pa mas lihe posibel, frena abuso contra hende muhe y mucha muhe rond di mundo.

   Prome Minister, durante e conferencia a duna un discurso indicando cu ta importante y esencial den e esfuersonan global pa logra igualdad di genero y boga pa derechonan y bienestar di muhe y mucha muhe. E “Pact for the Future” ta reconoce e importancia di igualdad di genero y con esencial e empoderamento di muhe y mucha muhe ta pa e desaroyo sostenibel. Violencia basa riba genero ta un di e manifestacionnan mas obvio di desigualdad di genero, destacando ainda mas con imperativo ta pa ataca e causa.

   Tambe e mandatario a subraya e echo cu no por warda mas pa actua y mester compromete na eradica tur forma di violencia contra hende muhe y mucha muhe y Aruba y Reino Hulandes ta comprometi cu e causa aki. Apesar cu Aruba, Curaçao y Sint Maarten no ta elegible pa ta parti di e “Spotlight Initiative” pa motibo di e status di e miembrecia di e islanan, Aruba y e islanan ta enfoca tur esfuerso riba prevencion di violencia y proteccion di sobrevivientenan di violencia di genero.

   Durante su discurso, Prome Minister a tuma e oportunidad pa gradici UN Women pa duna Aruba asistencia tecnico pa por a desaroya e prome plan nacional di igualdad di genero na Aruba y tambe pa sostene e pais cu intercambionan a base di conocemento. El a informa cu na Aruba, Gobierno a tuma pasonan firme pa atende cu violencia di genero door di comisiona un plan di implementacion a traves di un decreto ministerial cu e meta di eradica violencia contra hende muhe y mucha muhe. Aruba tin un fundacion den e lucha aki cu ta ehecutando entrenamentonan di prevencion hunto cu stakeholders cu ta directamente envolvi den atende casonan. Esaki ta pa sigura cu e victimanan ta ricibi e cuido y haya informacion di e pasonan legal cu por tuma.

   “Nos no por laga niun muhe of mucha muhe atras. Nos mester di boso conocemento y experiencia. Mi ta curasha Nacionnan Uni pa considera e inclusion di miembronan asocia di e organizacionnan regional manera nos den boso inicativanan. Mi ta pidi tur presente pa sigui apoya e iniciativa importante aki y laga nos tur traha hunto pa sigura e eradicacion di violencia di genero, tanto pa generacion actual como pa generacion futuro”, Prome Minister a expresa durante su discurso.