Prome grupo di studiante a viaha pa Hulanda

ORANJESTAD (AAN): Emocionnan tabata halto na Aeropuerto durante despedida di studiantenan recien gradua cu ta rumbo pa sigui cu nan estudio na Hulanda.

Entre dialuna y diamars, un total di 180 studiante ta na caminda pa Hulanda, na unda nan lo wordo ricibi pa Minister Plenipotenciario Ady Thijsen.

   Manera DIARIO a publica caba, e preparacionnan pa e opvang ta cuminsa na momento cu Arubahuis ricibi di Departamento di Enseñansa di Aruba un lista di studiantenan cu a indica di lo bin Hulanda. E studiantenan ta keda dividi entre e mentornan. Di e momento aki e mentornan ta cuminsa cu nan trabao cu ta encera entre otro tuma contacto cu e studiantenan. Manda nan un formulario cu pregunta cu nan mester yena. E mentornan ta organisa encuentronan online pa duna informacion y pa cera conoci cu e mentor y e POC (Plaatselijke Opvang Commissie). Ta traha un groupsapp pa asina na un manera rapido por intercambia informacion cu e grupo. Si algo no ta mucho cla, lo yama e studiante pa clarifica un ke otro.

   Arubahuis tur aña ta haci tur loke ta posibel pa ricibi y vang op e studiantenan nobo cu ta bin Hulanda pa studia. Esaki semper den cooperacion estrecho cu e studiementor y e POC nan.

DIARIO ta desea e studiantenan un bon viahe y exito den nan estudionan.