ORANJESTAD (AAN) “Mara mi tabata sa e importancia di t’ey presente y duna sosten na e mama na momento di embarazo.
Ami tabata kere cu djis duna cen ta suficiente”: Un tata cu a participa na Best Dad Ever durante un sesion.
Asina Fundacion Telefon pa Hubentud a duna di conoce den un comunicado di prensa reciente.
E prome grupo di tata pa aña 2025 a participa na Best Dad Ever y a finaliz’e cu un certificado. Best Dad Ever ta un proyecto caminda cu, durante 7 sesion tatanan y futuro tatanan ta traha riba nan habilidadnan pa ta un mihor tata di locual cu nan ta caba. Best Dad Ever ta stimula e participacion di hende homber den educacion di nan yiunan. E tatanan ta ricibi informacion, conocemento y tips con nan por ta mas involucra den bida di nan yiu y pakico esaki ta importante.
Un estudio haci na Aruba na 2012 a mustra cu e relacion entre tata y yiu na Aruba lo ta debil. Esaki a pone cu 131 Aruba a laga haci un estudio mas profundo na aña 2016 pa asina aki haya un mihor bista di kico tatanan ta pensa di nan rol den educacion di nan yiunan. Un di e resultadonan di e estudio ta cu tatanan kier ta mas involucra den educacion di nan yiunan. Debi na esaki 131 Aruba a crea Best Dad Ever na 2016 y a cuminsa cu implementacion di Best Dad Ever na 2017.
Algun temanan cu ta ser trata durante e sesionan ta por ehempel: impacto di un tata, planea famia, duna cuido, violencia etc. Algun partner cu tambe tabatin un rol importante durante algun di e sesionan ta Famia Planea y partera Stephanie Daal di Amare Midwife.
Best Dad Ever por tuma lugar danki na sosten di Futura, Setar N.V, Web Aruba N.V., Aruba Airport Authority N.V. y The Salamander Group.
