Prome Formacion Militar pa Militarnan di Caribe a cuminsa

ORANJESTAD (AAN):  Na Corsou 39 candidato a cuminsa cu e Prome Formacion Militar (Eerste Militaire Vorming EMV) pa Militarnan di Caribe.

            Durante un periodo intensivo di 9 luna e candidatonan ta siña tanto na Corsou como na Aruba, entre otro habilidadnan basico militar, maneho di armanan militar, y nan ta sigui un training di vigilancia y seguridad.

            E interes di e Militarnan di Caribe ta grandi: mas cu 300 homber y muhe di  Aruba y Corsou a meld durante aña cu a pasa.
            Despues di un procedura di un seleccion estricto, cu a tuma luga na principio di e aña aki, a selecciona e candidatonan mas adecua pa participa na e  formacion.
            E grupo actual ta consisti di 11 candidato di  Aruba y 28 candidato di Corsou, di  cua 3 muhe y 36 homber.

            Defensa ta contento cu mas y mas muhe ta meld nan mes pa e formacion pa Militar di Caribe. Cuminsando Dialuna muhe y hombernan entusiasma por registra di nobo.
            E formacion no solamente ta brinda e chens pa desaroya habilidadnan militar, pero tambe pa aporta na seguridad y proteccion di nan pais. E lote benidero lo cuminsa aña cu ta bini cu e Prome Formacion Militar.