Premier Wever-Croes:
ORANJESTAD (AAN) -- Premier Wever-Croes a declara, den entrevista cu DIARIO, cu prome cu fin di aña gobierno kier bin cu un destaho publico, cu companianan priva cu kier construi cas.
“Anto cu gobierno pone, e ora ey, tereno disponible cu nan por desaroya un proyecto di cas specialmente pa casnan accesible, pagable, cu famianan jong por paga, y tambe vivienda social. Eynan nos ta purba un manera pa alivia e situacion un tiki”, Wever-Croes a relata.
E dignatario a indica cu tin hopi reto cu Aruba ta enfrentando, y tin hopi hende mes cu no tin vivienda propio. Hopi famia ta biba hunto cual no ta e sistema mas desea, y mester soluciona e problema aki.
PA LOKE TA HERENCIA:
Otro aspecto ta e viviendanan bashi y tereno cu ta keda para, ora cu e doñonan ta fayece y tin heredero. “E ley a cambia un par di aña pasa y nos a hacie mas flexibel. Aworaki ta mas facil pasobra no mester tin firma di tur hende; si tin algun firma por mustra cu tin un interes grandi, por ehemplo si e cas a keda bay atras, y por acudi na Corte y Huez ta considera esaki y lo tene cuenta cu e otro herederonan tambe, pero no mester di tur heredero mas. Den casonan asina mi ta recomenda bay di biaha na un Notario, cu por duna bo recomendacion”, Minister Presidente a conclui.
