Dokter Nathalie Kingsale ta splica:
ORANJESTAD (AAN) – Psikiatra Nathalie Kingsale, den entrevista cu DIARIO a señala cu e problema di salud mental hopi biaha ta manifesta su mes mas como depresion y psicosis, y esaki Respaldo ta keda wak.
E specialista a señala cu e aspecto financiero ta hunga un rol importante den e stress cu hendenan ta experiencia, y pa tal motibo hopi ta cay den depresion pasobra no ta logra paga nan cosnan, y esaki ta causa cu nan ta bay den depresion mas lihe.
Dr. Kingsale a subraya cu stress ta acelera e problema di salud mental. Hopi biaha e ta un parti biologico y un parti di loke e persona a pasa den dje como mucha, kiermen den su lanta eigenlijk, “pero si bo tin e sensitividad pa bira depresivo anto tin yen di factor di stress rond di bo e chens ta mas grandi cu bo ta bira depresivo tambe; si tur cos ta bay bon e chens ta mas chikito”, Kingsale a acentua.
El a reitera cu problema financiero, pero tambe social, relacional, laboral, tambe ta hunga un rol. El a indica tambe cu Respaldo no tin un combersacion cu otro instancianan tocante e tema aki, pero na momento cu un persona ta wordo meld cerca Respaldo pero e motibo ta mas financiero y social, nan ta referi e sea na Hunto of DAS, pasobra nan tambe tin un parti psicologico cu ta guia hende y nan tin e parti financiero cu por duna guia.
“Si e persona tin un problema psikiatrico compleho, Respaldo tin trahadornan social cu ta guia nan, of check si nan mester bijstand, un pakete di cuminda, of si nan kier un trabao pero no ta capaz, ta wak si por haci’e via trabaonan boluntario, y si logra traha tanto ora pa dia, ta yude busca un trabao paga”, Dr. Kingsale a menciona.
