Solange Tchong, PR di AZV ta splica:
ORANJESTAD (AAN) Den entrevista cu DIARIO, Relacionista Publico di AZV, Solange Tchong, a splica tambe cu tin casonan na unda cu e pashent ta wordo informa door di su specialista, cu posiblemente tin cu haci un peticion na AZV pa e persona bay afo, pa tratamento medico, pero no necesariamente esey ta resulta asina.
“Kico mi kiermen? Tin ora durante e evaluacion di e pashent, por ehemplo, pendiente di testnan di laboratorio na Aruba mes, por resulta tambe cu e pashent ta den un condicion fisico cu no ta duna pa bay bek, of pa bay exterior, pa haya tratamento. E ora ey e specialista ta bay papia cu e pashent, tocante alternativanan cu por wordo duna na Aruba mes”, Solange Tchong a relata.
El a agrega cu esaki ta algo cu semper ta den desaroyo y ta algo cu semper bo ta den consulta cu specialista. “Nos tin cu corda cu salud ta algo dinamico; awe nos por ta bon, mañan nos ta bira malo, otro mañan nos ta recupera bek, y e situacion por bolbe cambia. Anto, esey ta haci cu no tur cos ta bay estilo hopi straight of di biaha hopi lihe, pasobra e ta depende tambe di con e curpa ta reaccionando riba un tratamento prome cu bay tuma un decision si mester bolbe haci un peticion na AZV, pa un pashent bay afo”, Solange Tchong a indica.
