Señora Sietske van der Wal:
ORANJESTAD (AAN) Señora Sietske van der Wal, di Aruba Conservation Foundation, den entrevista cu DIARIO, a sigui splica cu Blue Marine Foundation, cu ta yuda Departamento di Naturaleza y Medio Ambiente di Aruba (DNM) pa yega na un acuerdo di 2030, cu ta cay bao di Diversidad Biologico, y cu pa prome cu aña 2030 mester asigna alomenos 30% di tera y 30% di lama, como areanan natural proteha.
Señora van der Wal a señala cu e parti mas importante pa realiza ta cu e 30% mester hacie di un manera cu e por funciona pa Biodiversidad.
“Bo mester wak na unda tin mas hopi biodiversidad pa selecta e areanan ey, of areanan esencial pa biodiversidad; y no tur biodiversidad ta tur caminda. Pues, bo kier areanan representativo di bo Biodiversidad pero tambe mester wak e aspectonan economico, pasobra nos tin hopi hende cu ta haci uso di nos lama”, van der Wal a señala.
El a agrega cu, cu esey a inicia e proceso siman pasa, unda cu di estudionan por saca afo e informacion di nos biodiversidad y ecologia cu tin, y tambe ta saca afo ki informacion falta, pero ainda falta e informacion di e usuarionan, pa tin e diferente señalnan pa wak unda por asigna e areanan aki.
“Nos sa si, cu pa dedica suficiente proteccion na e biodiversidad completo di Aruba, bo mester bay pa un deseo cu ta rond di Aruba, anto esey no kiermen cu nada no mag. Kiermen cu rond di Aruba ta haya un regulacion y bo ta bay haya areanan designa pa diferente actividad”, Sietske van der Wal a indica.
El a agrega cu tur hende na Aruba sa cu den e costa west tin hende ta landa, snorkel, y jet sky tur riba otro, y esey no ta un bon idea; y door di asigna areanan specifico bo por regula y structura cosnan asina na un miho manera.
