Planea pa habri na Juli venidero
ORANJESTAD (AAN): Bon noticia a drenta den fin di siman. Ta asina cu CEDE Aruba tin e placer di informa comunidad di Aruba, y en particular e habitantenan di San Nicolas, tocante e ultimo desaroyonan encuanto e Lago Heights Park. E Proyecto aki ta representa un paso grandi bay dilanti den e creaccion di luga di recreo publico sigur, incluyente y di calidad halto, cu ta sostene e desaroyo sano di mucha y ta fortifica bida comunitario.
E fundamento pa e iniciativa aki a keda poni na 2023, tempo cu Aruba a wordo honra pa un bishita di Prinses Beatrix. Durante e bishita aki a presenta un donacion di €1.5 miyon na Stichting Jantje Beton, un organizacion Hulandes di conocimento specialisa den desaroyo di luga recreativo sigur y accesibel pa mucha.
Stichting Jantje Beton ta traha estrechamente cu gobierno Hulandes y Postcode Loterij Hulandes, y a apoya proyecto di desaroyo di luga recreativo den henter Caribe, incluyendo Saba, St. Eustatius y Bonaire.
Na mesun aña, CEDE Aruba a tuma iniciativa di invita Stichting Jantje Beton pa haci un Scan integral di Luga Recreativo na Aruba. E resultado di e evaluacion aki a mustra cu hopi luga recreativo tabata anticua, menos bon manteni, of no sigur, y cu solamente un cantidad limita di area di recreo ta completamente accesibel pa tur mucha. E estudio a identifica San Nicolas como un di e areanan cu e necesidad mas grandi pa inversion den infrastructura pa hunga sigur y incluyente.
Cu apoyo di Postcode Loterij, Stichting Jantje Beton y CEDE Aruba a tuma e decision conhuntamente pa priorisa e desaroyo di un luga di recreo comunitario na San Nicolas. Hunto cu habitante, scol y stakeholder di comunidad, a selecta Lago Heights Park como e luga mas adecua. Durante 2024 y 2025 a organiza multiple sesion di co-creaccion, envolviendo activamente mucha, mayor, docente y lider comunitario den forma e diseño. Durante 2025, e diseño final di e parke a keda completa pa arkitecto Raffy Kock.
Luga di Hunga: Esaki ta bira un Luga di Hunga Regional cu Tres Diferente Area di Wega. Lago Heights Community Park ta diseña como un luga recreativo y centro comunitario, structura alrededor di tres zona di hunga interconecta, cu hunto ta ofrece un gama amplio di experiencia di wega fisico, creativo y social.
E diseño ta traduci e resultadonan di e proceso di co-creacion comunitario den un paisahe coherente cu ta invita mucha pa move, explora, imagina y conecta. E tres zonanan di wega ta conecta a traves di paisahe ordena bon pensa, areanan berde, luga di descanso cu sombra, luga di sinta y caminda sin obstaculo.
E elementonan aki ta haci e parke no solamente un luga pa hunga, sino tambe un espacio publico ameno cu ta yama bonbini na famia, scol y comunidad en general. Hunto, e componentenan aki ta forma un luga di hunga balansa cu ta sostene actividad fisico, creatividad, cohesion social, y uso comunitario a largo plaso – posicionando Lago Heights Park como un modelo pa futuro desaroyo di luga di hunga na henter Aruba.
Financiamento y Implementacion: Debi na e tamaño y ambicion di e proyecto aki, e presupuesto total ta sobrepasa e fondonan disponibel inicialmente. Te na e fecha aki, Stichting Jantje Beton a compromete 300.000 Florin, CEDE Aruba a contribui 150.000 Florin, y Ministerio di Interior y Relacion di Reino (BZK), a traves di VNACS, a añadi 181.000 Florin. Na e momento aki, aproximadamente AWG 170.000 di fondo adicional ta necesario ainda pa completa e proyecto enteramente. Un peticion pa e suma restante a keda entrega na Gobierno di Aruba y CEDE Aruba a compronde cu e suma aki ta inclui den e presupuesto supletorio cu a wordo aproba recientemente.
Implementacion di e proyecto a cuminsa caba. A haci pedido pa diferente elemento y material di wega, incluyendo componente cu a busca den exterior, y trabao preparatorio ta na caminda. Construccion y instalacion lo tuma luga den fase, den estrecho cooperacion cu contratista local y autoridadnan publico. Ta anticipa cu Lago Heights Community Park por ta completamente cla y por habri pa publico na juli 2026.
Mirando futuro: Vision a Largo Plaso y Responsibilidad Comparti CEDE Aruba y Stichting Jantje Beton tin e claro intencion di drenta den un convenio a largo plaso cu Gobierno di Aruba. E convenio aki tin como meta sigura areglo di mantencion sostenibel pa Lago Heights Park y pa den futuro crea un cuadro pa e desaroyo di espacio di wega adicional sigur y incluyente riba henter e isla. Den e vision aki, CEDE Aruba ta trata di envolve activamente sector priva, organizacionnan local, y comunidad en general. E desaroyo, cuido y conservacion di espacio di wega ta un responsabilidad comparti. Inverti den mucha ta nifica inverti den futuro di Aruba - y e responsabilidad ey ta pertenece na nos tur.
